لە سەرەتای ئەم مانگەوە نرخی بەنزین بەردەوام لە بەرزبوونەوەدابووە و ئەمڕۆش بۆ جاری چوارەم بەرزبوونەوەی بەخۆیەوە بینی.
ئەمڕۆ هەینی، گۆران لوقمان پەیامنێری ئێن ئاڕ تی لە سلێمانی ئاماژەی بەوەدا، ئەمرۆ جارێکی دیکە نرخی بەنزین لە وێستگەکانی سوتەمەنی بەرزبووەوە و بۆ هەر لیترێک بەنزین نرخەکەی ٢٥ دینار بەرزبووەتەوە.
ئەوەشی خستەڕوو، لە ئێستادا نرخی بەنزین بەشێوەیەکی گشتی لە هەرێمی
کوردستان بەم شێوازە بەرزبووەتەوە:
لیترێک بەنزینی سوپەر هەزار
و ٣٠٠ دینارە
لیترێک بەنزینی موحەسەن هەزار
و ١٧٥ دینارە.
لیترێک بەنزینی نۆرماڵ هەزار
و ٢٥ دینارە.
ئەمە لەکاتێکدایە، لەماوەی
رابردوودا بەشێوەی پلەبەندی حکومەتی هەرێم دەستی کرد بەرزکردنەوەی نرخی بەنزین و
بەهۆیەوە لە رۆژی چوارشەممە رێکەوتی ٩ی ٣ی ٢٠٢٢ بەشێک لە شۆفێرانی تەکسی لە سلێمانی
دژی گرانی نرخی بەنزین لە ناوبازاڕەوە دەستیان بە خۆپیشداندان کرد.
هەروەها، لەهەولێریش
هاوڵاتییان و شۆفێران نیگەرانی و ناڕەزایەتی خۆیان دەربڕی.
هاوڵاتیانیش باس لەوەدەکەن،
نرخی بەنزین هێندە گرانە توانای پڕکردنەوەی تانکییەکانیان نییە، لەکاتێکدا، لە کەرکوک
و شارەکانی دیکەی عێراق بە گرانبوونی نرخی نەوتیشەوە هێشتا بەنزین لە نێوان ٤٠٠ بۆ
٦٠٠ دیناردایە و نەبووەتە بارگرانی بۆ هاوڵاتیان.