ترەمپ رایشیگەیاند، هێزەکانیان بەردەوامن لە تێکشکاندنی توانای سەربازیی ئێران و وتی: ئامادەن لە هەر کاتێکدا بیانەوێت هێرشی دیکەش ئەنجامبدەنەوە، ئاماژەی بەوەش کرد، ئێران هەوڵی دروستکردنی موشەکێکی دەدا بۆ بڵاوکردنەوەی مین لە ناوچەکە، بەڵام توانرا بە تەواوی تێکبشێندرێت.

لەبارەی گەرووی هورمز و کەرتی ئابووریشەوە، وتی، رۆژانە بەبێ ئاستەنگی گەورە ملیۆنان بەرمیل نەوت لە رێگەی کەشتییەکانەوە بە ناو گەرووی هورمزدا تێپەڕێنرێن و هێزەکانیان کۆنتڕۆڵی ناوچەکەیان کردووە، رایشیگەیاند، درێژەدان بەم کەمپینە سەربازییە لەسەر ئێران زۆر درێژە ناکێشێت و بنەمای سەرەکیی هەڵوێستی ئەمریکاش رێگریکردنە لەوەی تاران ببێتە خاوەنی چەکی ئەتۆمی.

لە لایەکی دیکەوە و وەک پەرچەکردارێک بەرامبەر بڕیار و هێرشەکانی ئەمریکا، موحسین رەزایی، هەڕەشەی توندی ئاڕاستەی ئیدارەی واشنتن کرد و رایگەیاند، ئەو پەلامارانەی ئەمریکا رێگەیان پێنادات لەو قەیرانە رزگاریان ببێت کە بۆ خۆیان دروستیان کردووە.

وتیشی، بەم زووانە دەبینن کە ستراتیژییە نوێیەکەی ئێران لە مەیدانی جەنگ و دیبلۆماسی و رووبەڕووبوونەوەی گەمارۆی ئابووریدا کۆڵەکەکانی ئەمریکا دەلەرزێنێت و رووبەڕووی وێرانکارییان دەکاتەوە.