ئەم هەوڵەی عێراق بۆ کڕینی ئەم فڕۆکانە دەکەوێتە ناو ستراتیژییەتێک بۆ نوێکردنەوەی هێزی ئاسمانیی و بەهێزکردنی توانا بەرگرییەکانی، بەجۆرێک کە لەگەڵ گەشەسەندنی شەڕی نوێدا بگونجێت، کە زیاتر پشتی بە سیستەمە ئاسمانییە بێفڕۆکەوانەکان دەبەستێت بۆ هەواڵگریی و پشتیوانیی شەڕکردن.

فڕۆکەکە خاوەنی توانای هەواڵگری و شەڕکەری پێشکەوتووە و دەتوانێت تا بەرزیی ٣٠ هەزار پێ بفڕێت بۆ ماوەی زیاتر لە ٣٠ کاتژمێری بەردەوام و مەودای کارپێکردنی زیاتر لە چوار هەزار کیلۆمەترە و دەتوانێت ٢٢٠ کگم لە مووشەکی رێنماییکراو و بۆمبی زیرەک و ئامێری هەستەوەری پێشکەوتوو هەڵبگرێت، ئەمەش وادەکات گونجاو بێت بۆ ئەرکەکانی چاودێری، پاراستنی سنوورەکانی عێراق و بەرەنگاربوونەوەی ڕێکخراوە چەکدارەکان.
هاوکات، سابت عەباسی دەشڵێت، لە گفتوگۆی پێشکەوتوودان لەگەڵ پاکستان بۆ کڕینی فڕۆکەی بێفڕۆکەوانی جۆری شاهبار ٢ ، کە خاوەنی توانای هێرشبەری و هەواڵگری بەرزە.

شاهبار٢ یەکێکە لە فڕۆکە نوێیەکان  و بۆ ئەرکەکانی چاودێری و هێرشی وردی ئاراستەکراو بەکاردەهێنرێت  و فڕۆکەکە مەوداکەی دەگاتە نزیکەی هەزار و پەنجا کیلۆمەتر و بە خێراییەکی زۆر کار دەکات، لەگەڵ توانای پەیوەندیکردن بە مانگە دەستکردەکانەوە و دووبارە دەستپێکردنەوەی بزوێنەر لە کاتی فڕیندا، کە رێگە بە بەکارهێنانی دەدات لە بارودۆخە جیاوازەکاندا.