بەگوێرەی ئامارەکە، عێراق بە هەناردەکردنی نۆ ملیۆن و ٨٢٥ هەزار بەرمیل نەوت، لە پلەی دووەمی وڵاتانی "ئۆپێک"دا بووە کە زۆرترین نەوتیان هەناردە کردووە و سعودیەش بە نۆ ملیۆن و ٩٩٦ هەزار بەرمیل لە پلەی یەکەمدا بووە، پاشان نەیجیریا بە سێ ملیۆن و ٧٦٨ هەزار بەرمیل لە پلەی سێیەمدا هاتووە.
هەروەها جەزائیر بە دوو ملیۆن و ١١٢ هەزار بەرمیل لە پلەی چوارەمدا بووە، پاشان لیبیا بە دوو ملیۆن و ١١ هەزار بەرمیل، گابۆن بە ٦٧٨ هەزار بەرمیل، کوەیت بە ٦٥٠ هەزار بەرمیل و ڤەنزوێلا بە ١٧٥ هەزار بەرمیل لە پلەی هەشتەمدا هاتووە.

ئیدارەی وزەی ئەمریکا ئاماژەی بەوەشکردووە، وڵاتانی دیکەی ئەندام، کە بریتی بوون لە کۆنگۆ، ئێران و ئیمارات، هیچ بڕێک نەوتیان بۆ ئەمریکا لە مانگی تەممووزدا هەناردە نەکردووە.

ئەمریکا یەکێک لە گەورەترین بەرهەمهێنەری نەوت و هاوکات بەکاربەری نەوتە لەسەر ئاستی جیهاندا و رۆژانە زیاتر لە ٢٠ ملیۆن بەرمیل نەوت و بەرهەمە نەوتییەکان بەکاردەهێنێت، لە بەرامبەریشدا عێراق بۆ بودجەی ساڵانەی بە شێوەیەکی سەرەکی پشت بە فرۆشتنی نەوت دەبەستێت، کە رێژەکەی دەگاتە نزیکەی ٩٢٪، ئەوەی دیکە بە داهاتی نانەوتی پڕی دەکاتەوە.