PM:01:36:01/08/2025
4084 جار خوێندراوەتەوە
حکومەتی عێراق تاوانبارێكی شاڵاوەكانی ئەنفالی بە ناوی "عەجاج ئەحمەد حەردان" دەستگیرکرد کە یەکێک بووە لە سەرپەرشتیارانی زیندانی نوگرە سەلمان لە پارێزگای سەماوە لە باشووری عیراق، کە تێیدا هەزاران هاوڵاتیی کورد لە کارەساتی ئەنفالدا زیندانیکراون و رووبەڕووی ئەشکەنجە و مەرگ بوونەتەوە.
عەجاج یان حەجاج، ناوی تەواوی (عەجاج ئەحمەد حەردان)، خەڵکی تکریتە و لە عەشیرەتی ئەلبوناسر و هۆزی نزارە، واتە عەشیرەتەکەی سەدام حسێن، هەروەها پلەی رائیدی ئەمن بووە، لە دوای روخانی رژێمی بەعس، ماڵی لە کەرکوک بووە، دواتر بەرەو سوریا هەڵهاتووە و لە گەڕەکی جەرمانەی دیمەشقی پایتەختی سوریا لەناو باڵەخانەیەکدا ژیاوە.
جێی ئاماژەپێدانە، لە کاتی دادگایکردنی سەرانی رژێمی بەعس، بەردەوام
سەیری پرۆسەکەی کردووە و ئاگاداری ئەوە بووە ناوی وەک تاوانبار لە تاوانی ئەنفالدا
هاتووە.
ناوبراو سێ کوڕی هەبووە، دووانیان بوونەتە چەکداری قاعیدە و لە
شەڕێکدا لە ناحیەی (زلوعیە)ی پارێزگای سەڵاحەدین کوژراون، هەروەها کوڕە بچووکەکەی
ناوی رائید بووە و لە سوریا لەگەڵ باوکیدا ژیاوە.
عەجاج دوو پاسەوانی تایبەتی هەبووە بەناوەکانی شەوقی و سەخر؛ شەوقی لە
ساڵی ٢٠١١ چووەتە ئەڵمانیا و داوای مافی پەنابەری کردووە و چارەنووسی سەخر نادیارە.
بەپێی گێرانەوەکانی ئەو کەسانەی لە زیندانی مەرگی نوگرەسەلمان
گەڕاونەتەوە و چیرۆکی ژیانی زیندانی و دڕندەیی رژێمی بەعسیان بەرامبەر بە
کورد گێڕاوەتەوە، باسیان لەوە کردووە؛ کە عەجاج بەرپرسی زیندانەکە بووە، باڵابەرزێکی
دەموچاو تاریک و دڕندەبوو، هەر کە دەهاتە هۆڵەکانی زیندان بەبێ ئەوەی کە چەند
کەسێک رەوانەی مەرگ نەکات دەرنەدەچوو، تەنانەت دوای گوللەبارانکردن و لەسێدارەدانیان،
تەرمەکانی دەخستە بەردەم سەگەکانی و خۆشی بەدەمییەوە پێدەکەنی و ئەشکەنجەی دەدان.
