دوا ڕووداوەکانی سلێمانی

3552 جار خوێندراوەتەوە

سلێمانی پایتەختی ڕۆشنبیری و شارە حیاتەکەی مام جەلال کە دەیگوت وەڵامی قەڵەم بەقەڵەم بدەنەوە بانگەشەی دیموکراسی دەکرد و بە شاری ئازادی ناسراوە، دوای چەندین ساڵ رووی راستەقینەی دەرکەوت ئەم "ئازادییە" تەنها بە ناو و وتار هەیە، لە ڕاستیدا هەربوونی نیە ئەگەرچی دەوترێت هەموو کەس دەتوانێت قسەی خۆی بکات، بەڵام فەرموو ئیستا زۆربەی سەرۆکانی حزبی ئۆپۆزسیۆن لە زیندانن!

کوان ڕۆژنامەوان و ڕووناکبیری ئەم شارە کە چەند ساڵە بە به‌ژن و باڵای سلێمانی دەگوترێت سلێمانی شاری ئازادی و ئازادی ڕادەربرینە تەنانت سیاسیەکانیش ناتوانن بڵێن ئەم کارێکی دروست نەبوو بەتایبەت کوشتنی ئەو گەنجە خێر لەخۆنەدیوەیان، پێش هەموو شتێک یەکێتی دەبێت شەرم بکات و داوای لێبوردنی لە خەڵکی کوردستان و بە تایبەتی سلێمانی شاری ڕۆشنبیری بکردایە مەگەر بەس خەڵکی ئەو شارە خۆیان بزانن شەوی ڕووداوەکە هێرشی سەر لالەزار بە تانک و تۆپ و درۆن و دۆشکە چیان لە ژیانی ئەو شارە و خەڵک و گەنجە خێر لە خۆنەدیوەکانی کرد ‎ئێستا یەکێتی دەبێت پرسیار لە خۆی بکات ئاوا لە هەڵمەتی بانگەشەی هەڵبژاردن هاواریان ئەکرد هەولێر وەردەگرینەوە؟

ئێستا خەڵکی سلێمانی زۆرێک لە دوای ڕووداوەکە ئاوات بە ئارامی هەولێر دەخوازن نەک ئەوەی هەولێر وەربگرنەوە زیادەڕەوی نییە بڵێم کاتی هاتووە سلێمانیشیان لێوەربگیرێتەوە، لە هەمووی ناخۆشتر و خەمبارتر ئەوەیە کە کورد جارێکی تر دەستی چووە خوێنی یەکتر، دەزانم شەڕەکە بۆ پۆست و پارە و مەنسەب و بەشێکیشی تریشی دەسەڵاتی ماڵی تاڵەبانی بوو لە ئامۆزاکانیان.

بەڵام هەموو شتێک بە خوێ و خوێش بە مەعنا مانای هەیە لە ناوچەیەکی گەشتیاری وەک سەرچنار بەبێ ئاگادارکردنەوەی ئەو گەڕەکەی کە مێژوویەکی جوان و پرشنگداری گەشتیاری هەبووە بەو شێوەیە هێرشی بکەیتە سەر؟ یان جگە لەوەش زۆرێک لەم هۆتێلانەی کە لەنزیک لالەزار بوون میوان و گەشتیاریان تیابووە بەو شێوە پێشوازی لە گەشتیار دەکەن؟ باوەڕناکەم جارێکی تر ئەوانە بگەڕێنەوە سلێمانی؟ ‎بۆ ئێوەی بەجێ دەهێڵم دوای شاسوار و لاهور سەرەی کێ دێت؟؟؟