كۆمسیۆنی باڵای هه‌ڵبژاردنه‌كانی عێراق رایگەیاند، ژماره‌ی پارت و لایه‌نه سیاسییه‌كان، كه به‌شداریی له هه‌ڵبژاردنی داهاتوو ده‌كه‌ن ئاشکرا دەکات، هاوكات سه‌باره‌ت به هاوپه‌یمانییه‌كانی پێشوو و نوێكانیش روونكردنه‌وه ده‌دات.
ئەمڕۆ پێنجشەممە ١٧ـی نیسانـی ٢٠٢٥، جومانه غه‌لای، وته‌بێژی كۆمسیۆنی باڵای هه‌ڵبژاردنه‌كانی عێراق ژمارەی ئەو پارت و هاوپەیمانییە سیاسییانەی خۆیان بۆ به‌شداریی له هه‌ڵبژاردنی داهاتوو تۆمار كردووه ئاشكرا كرد و وتی، زیاتر له ٣٢٠ پارتی سیاسی و ٦٠ هاوپه‌یمانی تۆمار كراون.
باسی لەوەشکرد، هەموو پارت و هاوپه‌یمانییه
سیاسییه‌كان له لایه‌ن كۆمسیۆنه‌وه بانگهێشت ده‌كرێن بۆ ئەوەی راپۆرت بدەنە بەشی
پەیوەندیدار بۆ تۆمارکردنی خواستی بەشداریکردنیان.
ئەوەشی خستەڕوو، ئەو هاوپەیمانییانەی پێشتر تۆمار
کراون و هیچ گۆڕانکارییەکیان بەسەردا نەهاتووە دەتوانن راستەوخۆ پەیوەندیی بە كۆمسیۆنه‌وه
بکەن بۆ تۆمارکردنی ئارەزووی بەشداریکردنیان، سەبارەت بەو هاوپەیمانییانەی کە
گۆڕانکارییان بەسەردا هاتووە، واتە هاوپەیمانی نوێن، دەبێت رێکارە دیاریکراوەکان
بگرنه‌به‌ر و سه‌ردانی كۆمسیۆن بكه‌نه‌وه بۆ تەواوکردنی پرۆسەی تۆمارکردن.
وتیشی،
ئەم قۆناغە لە ١٥ـی نیسان دەستی پێکردووە و تا ٤ـی ئایار بەردەوام دەبێت.