حکومەتی ماوەبەسەرچوو دەڵێت، لیستی مووچە و دەرخستەی کۆتایی مانگی شەش دراوەتە عێراق. دەشڵێت، "ئەو بڕە نەوتەی بۆ هەناردەكردن ئامادەیە رادەستی سۆمۆی دەکەین".
ئەمڕۆ چوارشەممە ٣٠ـی تەممووزی ٢٠٢٥، بە ئامادەبوونی مەسرور بارزانی، سەرۆکی حکومەتی ماوەبەسەرچوو و ئامادەبوونی قوباد تاڵەبانی، حکومەتی ماوەبەسەرچوو کۆبوونەوە لەسەر چەند برگەیەک گفتوگۆیانکرد.
بەپێی راگەیەندراوەکەیان بڕگەی یەكەمی كۆبوونەوە، تاوتوێكردنی دوا
هەنگاوەكانی خەرجكردنی مووچەی مانگی پێنج و شەشی ئەمساڵ، بوو لەبەر رۆشنایی
بڕیاری هاوبەشی هەردوو ئەنجومەنی وەزیرانی فیدراڵ و هەرێم و بە دواداچوونی كاری
لیژنە هاوبەشەكانی وەزارەتی دارایی و دیوانی چاودێری دارایی فیدراڵ و هەرێم بە پێی
دوا بڕیاری هەردوو ئەنجومەنی وەزیرانی فیدراڵ و هەرێم .
وەزیری دارایی و ئابووری ئاماژەی بەوە دا كە نوێنەرەكانی هەرێم لە
لیژنەی هاوبەشی هەردوولا بۆ پۆلێنكردنی داهاتە نانەوتییەكان و دەستنیشانكردنی بەشی
گەنجینەی فیدڕاڵیی لەم داهاتانە، هاوكار بوون لە سەرخستنی كاری لیژنەكە و پشتبەست
بە دەستوور و یاسای بەڕێوەبردنی دارایی فیدڕاڵی و یاسای بودجەی سێ ساڵە، بە وردیی
پێشنیاری هەرێمیان لەم بارەیەوە ئامادە كردووە.
وەزیری دارایی و ئابووری، روونیكردەوە كە لیستی مووچە و دەرخستەی کۆتایی
مانگی حوزەیران، رەوانەی وەزارەتی دارایی فیدراڵ كراوە و ئەركی وەزارەتی دارایی
عێراقە كە لە بەرامبەردا، مووچەی مانگی حوزەیرانی مووچەخۆرانی هەرێم خەرج بكات.