باس لەوەش کراوە، بەریتانیا بەردەوام دەبێت لە پاڵپشتیکردنی ئاسایشی عێراق، بۆ ئەو مەبەستەش لە ماوەی چەند مانگی داهاتوودا لەگەڵ هاوبەشە عێراقییەکانیان کار دەکەن لەسەر پەرەپێدانی هاوبەشییەکی نوێ لە بواری ئەمنی و بەرگریدا.

راگەیەنراوەکەی وەزارەتی بەرگریی بەریتانیا دوای ئەوە دێت، دوێنێ عێراق و ئەمریکا لە بەیاننامەیەکی هاوبەشدا جەختیان لەوە کردەوە، لە ماوەی ١٢ مانگی داهاتوودا کۆتایی بە ئەرکی هێزەکانی هاوپەیمانان لە خاکی عێراقدا دێت و هێزەکان دەکشێنەوە، تاوەکو مانگی ئەیلولی ساڵی ٢٠٢٥ـیش بەردەوام دەبن لە ئەرکەکانیان.

ئەوەش لەکاتێکدایە، لە ساڵی ٢٠١٤ دوای سەرهەڵدانی گروپی چەکداریی داعش، هاوپەیمانیی نێودەوڵەتی بە سەرۆکایەتی ئەمریکا پێکهێنرا بە ئامانجی رووبەڕووبوونەوە و نەهێشتنی ئەو گروپە.

لە ساڵی ٢٠١٤ بڕیار درا لەسەر پێکهێنانی هاوپەیمانیی نێودەوڵەتی بە سەرکردایەتی ئەمریکا و بە بەشداری ٨٧ ئەندام، کە ئەرکی سەرەکییان بەرەنگاربوونەوەی گروپی چەکداریی داعش بوو لە عێراق و سوریا، بەریتانیاش وەک یەکێک لە ئەندامەکانی هاوپەیمانێتییەکە لەسەر بانگهێشتی عێراق ژمارەیەک سەرباز و راوێژکاری سەربازیی رەوانەی ناوچەکە کرد و جێگیر کران.