هەر بەپێی زانیارییەکانی پەیامنێری ئێن ئاڕ تی، گرفتەکە لەنێوان ماڵێک و ئەو کوڕەی عەبدوڵای کوێخا موبارەکدا بووە و دوابەدوای رووداوەکەش خانو و ماڵی لایەنی بەرامبەر لەلایەن کەسانی نەناسراوەوە سوتێنراوە و بەرگری شارستانی چەمچەماڵ سەرقاڵی کۆنتڕۆڵکردنی ئاگرەکەن.
پێشتریش کوڕێکی دیکەی ئەو بەرپرسەی پارتی تۆمەتباربوو بە کوشتنی کەسێک. هەر بەپێی زانیارییەکان، ئەو کوڕەی کوژراوە، ناوی سەرهەدە و کورە بچوکی عەبدوڵای کوێخا موبارەکە.

پەیامنێری ئێن ئاڕ تی باسی لەوەشکرد، ماڵی ئەو کەسەی کە تەقەی لە کوڕەکەی عەبدوڵای کوێخا موبارەک کردووە بەتەواوی سوتێندراوە و چەندین ماڵیش لە دەوروبەریدا بەهۆی دەستڕێژی گولەوە گولە بەرماڵەکانیان کەوتووە و زیانیان پێگەیشتووە. ئەوەشی خستەڕوو  پێشتر کێشە لەنێوان هەردوولادا هەبووە.

لەو بارەیەشەوە رەمک رەمەزان قائیمقامی چەمچەماڵ بە ئێن ئاڕ تی راگەیاند، لە ئێستادا سەرقاڵی لێکۆڵینەوە و کۆنترۆڵکردنی رووداوەکەن.

وتیشی، هەردوولا خزمایەتیان هەیە و ساڵی رابردوو کێشەیەکی کۆمەڵایەتییان هەبووە کە بەهۆی ئەو رووداوەوە بووە، لە ئێستاشدا لایەنی کوژراو پەلاماری ماڵی بکوژیانداوە و ماڵەکەیان سوتاندووە.

بەپێی ئەو زانیارییانەی دەست ئێن ئاڕ تی کەوتووە، پێشتر سکاڵا لەدژی کوڕەکەی عەبدوڵای کوێخا موبارەک تۆمارکراوە، بەڵام بەهۆی ئەوەی لەلایەن پارتی دیموکراتی کوردستانەوە داڵدە دراوە و ماوەیەک کوڕەکە لە هەولێر ماوەتەوە و دواتر گەڕاوەتەوە بانی مەقان بۆلای باوکی و هیچ رێکارێکی یاسایی بەرامبەر نەگیراوەتەبەر.

هـ.ئـ