ئاماژەی بەوەشداوە، لە کۆبوونەوەکەدا دۆخی گشتیی عێراق، دوایین گۆڕانکاری و پەرەسەندنەکانی ناوچەکە، هەروەها گرنگیی چارەسەرکردنی بنەڕەتی کێشەکانی نێوان حکومەتی ماوەبەسەرچووی هەرێم و حکومەتی فیدراڵیی عێراق لەسەر بنەمای دەستوور و کارنامەی حکومەتی نوێی عێراق تاوتوێ کران.

راگەیەنراوەکە ئەوەشی خستووەتەڕوو، لە تەوەرێکی دیکەی کۆبوونەوەکەدا، جەخت کراوەتەوە لە رێزگرتن و پاراستنی سەروەریی خاکی عێراق و هەرێمی کوردستان، هەروەها سنووردانان بۆ بۆردومانکردن و هێرشکردنە سەر هەرێمی کوردستان.

ئەمە لەکاتێکدایە، لەماوەی رابردوودا، ئێران لە رێگەی مووشەک و درۆنی خۆکوژییەوە چەند هێرشێکی بۆ سەربنکە و بارەگەکانی پارتە کوردییە ئۆپۆزسیۆنەکانی ئەو وڵاتەی لەناو خاکی هەرێم ئەنجامدا و بەهۆیەوە ژمارەیەک کەس کوژران و برینداربوون.

هەروەها، تورکیاش لە رێگەی ئاسمانییەوە بۆ سەر بنکە وبارەگاکانی پارتی کرێکارانی کوردستان هێرشی کردە سەر هەرێمی کوردستان و رۆژئاوای کورستان و رەجەب تەیب ئەردۆغانیش سەرۆکی ئەو وڵاتە ریگەیاند، لە چەند رۆژی داهاتوودا هێرشی زەمینی بۆ رۆژئاوای کوردستان و هەرێمی کوردستان دەستپێدەکەن.

هێرشەکانی ئێران و تورکیا بۆ سەر هەرێمی کوردستان کاردانەوەی ناوخۆیی و دەرەکی لێکەوتەوە و بە پێشێلکردنی یاسا نێودەوڵەتییەکان و دەستدرێژی بۆ سەر سەروەری عێراق وەسفکران.