PM:08:46:03/03/2026
184 جار خوێندراوەتەوە
+
-
گواردیۆلا دوایین پێشهاتەکانی پێکانەکەی هالاند و ئامادەکارییەکانی
سیتی ئاشکرا دەکات بۆ یارییەکەی نۆتینگهام.
پیپ گواردیۆلا، راهێنەری یانەی مانچستەر سیتی، پێش یارییە گرنگەکەی بەرامبەر
نۆتینگهام فۆرێست لە هەفتەی 29ی خولی نایابی ئینگلتەرا، تیشکی خستە سەر بارودۆخی
جەستەیی ئێرلینگ هالاند و ئاماژەی بەوە کرد کە ئەستێرە نەرویجییەکە هەست بە
باشتربوونێکی بەرچاو دەکات، بەڵام بڕیاری کۆتایی لەسەر بەشداریکردنی بەندە بە کۆتا
مەشق و راهێنانەکان.
هەروەها رایگەیاند کە یاریزان
نیکۆ ئۆرایلی لە هەمان بارودۆخی هالاندایە و چاوەڕێی پشکنینە کۆتاییەکان دەکەن.
گواردیۆلا جەختی لەوە کردەوە کە خولەکە گەیشتووەتە قۆناغێکی
یەکلاکەرەوە و تەنیا 10 یاری ماوە بۆ کۆتایی، لە کاتێکدا ئەوان پێنج خاڵ لە دوای
ئارسناڵی پێشەنگەوەن، بۆیە هیچ بوارێک بۆ لەدەستدانی خاڵ نەماوە.
ڕاهێنەرەکە خۆشحاڵی خۆی
دەربڕی کە تیپەکەی تا مانگی ئازار هێشتا لە نێو ململانێی هەموو نازناوەکاندایە و
ئەمەی بە دەستکەوتێکی گەورە بۆ یاریزانەکانی ناوبرد.
لە کۆتاییدا ئاماژەی بە
جیاوازی شێوازی یاریکردن لە چامپیۆنز لیگ کرد و رایگەیاند کە گەورەیی ئەو
پاڵەوانێتییە لەوەدایە کە راهێنەران ناچار دەکات لەگەڵ فەلسەفە و تاکتیکە
جۆراوجۆرەکاندا خۆیان بگونجێنن.