١ی نیسانی هەموو ساڵێک دەکاتە جەژنی ئەکیتۆی ئاشورییەکان، یان جەژنی سەری ساڵی بابلی ئاشوری، لەو جەژنەدا وەکو نەریتێک ساڵانە فیستیڤاڵ و چالاکی جیاواز بەڕێوەدەچێت. بۆ ئەمساڵیش لە دهۆک و هەولێر ئەو یادە کرایەوە.
لە دوو ساڵی رابردوودا بەهۆی رێکارەکانی ڤایرۆسی کۆرۆنا و قەدەغەی هاتوچۆوە ئاهەنگ و فیستیڤاڵ لەلایەن ئاشورییەکانەوە لەو رۆژەدا ئەنجامنەدرا و بۆنەکان بچووک بوون؛ کە ئاهەنگەکانیان نزیکەی ١٢ رۆژ دەخایەنێت و بەدەر لە ئاهەنگ گێڕان سەیران و گەشتیشی تێدایە.
دوێنێ و ئەمڕۆش
لە دهۆک و هەولێر ئاشورییەکان بە جل و بەرگی تایبەتی خۆیانەوە ئەو یادەیان کردەوە.
ساڵانەش لە هەرێمی کوردستان ١ی نیسان کراوەتە پشووی فەرمی بەبۆنەی ئەو جەژنەوە، بەڵام ئەمساڵ بەر رۆژی هەینی کەوت.
ئاشوورییەکان نەتەوەیەکن
خاوەنی زمان و ئایینی تایبەت بە خۆیانن و لە مێژەوە لە کوردستان و ناوچەکانی دەوروبەریدا
دەژین. لە سەدەی ڕابردوودا ژمارەیەکی زۆریان کۆچیان کردووە بۆ قەوقاز و وڵاتانی ئەوروپا
و ئەمریکا و لە ئێستاشدا بەشێکی زۆریان لە نەينەوا وھەولێر و دھۆك دەژین.
بەپێی سەرچاوە
مێژووییەکان؛ وشەی ئاشور لەناوی خواوەندە سەرەکییەکانەوە وەرگیراوە و یەکەم پێتەختیشیان
ھەر بەو ناوەوە ناونراوە. لەسەرەتای دەرکەوتنیانەوە لەبەرامبەر بنەماڵە بەھێزەکانی
ناوەڕاست و باشوری عێراق و سۆمەرییەکان و خۆرییەکان لە کوردستان و حیسییەکان لە ئەنادۆڵ،
نەیانتوانی فەرمانڕەوایی خۆیان بچەسپێنن. بەڵام لە ھەزارەی دووەمەوە بوژانەوە و لە
ڕووی شارستانییەتیشەوە بەرەو پێش چوون.
سەردەمی فەرمانڕەوایی
ئاشورییکان دەکرێ بەسێ بەشەوە کە قۆناغەکانی (ئاشوری کۆن، ئاشوری ناوەند، ئاشوری
نوێ)ن و مێژووەکەشیان بۆ زیاتر لە پێنج هەزار ساڵ بەر لە زایین دەگەڕێتەوە.
