ماوەیەکە سەرەڕای سستی لە دابەشکردنی موچەدا، کێشەی دیارنەمان و کەمبوونەوەی داهاتەکانی سلێمانی هەیە و کێشەکە بە چارەسەر نەکراوی ماوەتەوە.
بڕیاربوو وەزارەتی دارایی رۆژی ٦ی ئەم مانگە موچەی دەزگای ئاسایش دابەشبکات، بەڵام تاوەکو ئێستا کە دوو رۆژ تێپەڕبووە موچەی دەزگای ئاسایش لە پارێزگاکانی سلێمانی و هەڵەبجە و ئیدارەکانی کۆیە و راپەڕین دابەشنەکراوە.
لە مانگی رابردووشدا، بە هەمان شێوە دابەشکردنی موچەی
دەزگای ئاسایش لە سنوری پارێزگاکانی سلێمانی و هەڵەبجە دواکەوت.
لەبارەی کێشەکەوە، وەزارەتی دارایی دەڵێت، پەیوەندی بە نەبوونی
پارەوە هەیە لە سنوری سلێمانی و هەڵەبجە کە دەبێت لە داهاتی ناوخۆ بخریتە سەر ژمارە
بانکی وەزارەتەکەیان.
لە پێشتردا، بەهۆی دواکەوتنی موچەی خانەنشینانەوە لە
سنوری سلێمانی، وەزارەتەکە دەسەڵاتەکانی بەڕێوەبەری گشتی بانکی ناوەندی هەرێمی لە
سلێمانی سڕکرد.
داهاتی حکومەتی هەرێم مانگانە زیاترە لە دوو ترلیۆن دینار،
لەکاتێکدا تەواو موچەی فەرمانبەران پێویستی بە نزیکەی ٩٠٠ ملیار دینارە، بەڵام
حکومەت مانگانە چاوی لە ٢٠٠ ملیارەکەی بەغدایە و بەو بیانووەوە دابەشکردنی موچە
دوادەکەوێت و لەکاتی خۆیدا دابەشناکرێت.
هێرش قادر، هەولێر