رێنماییەکانی بەرگری شارستانی سلێمانی:

١- پێوستە ھەموو ماڵێک بۆری ئاوەڕۆی "موڕەجەع"ی بۆ دابنێت لە دەرەوەی ماڵی خۆی تا لە کاتی پڕبوونی مەنھۆڵی گەڕەکدا نەگەڕێتەوە ناو خانووەکەی.

٢- ئەو ماڵانەی گەراجی دفن یا نھۆمێکی خانوەکەیان چاڵە لە ئاستی جادەوە پێویستە حەوزێکی مەتر چوارگۆشە دروست بکات و موزەخەی تایبەتی ئاو هەڵکێشان دابنێت لە ناویدا بە حەرەسی زیرەکەوە، ھەرکات ئاو ھاتە ژوورەوە ئۆتۆماتیکی خۆی بکەوێتە کار و نەھێڵێت ئاو گل بێتەوە.

٣- پاکردنەوەی مەنھۆڵی ناو ماڵ لە زیخ و بەرد قوڕ و پیسی، ھەروەھا لابردنی سەر گونجەکان لە سەربان و حەوشە تاکو ئاو بە رێژەیەکی زیاتر بڕوات.

٤- پاککردنەوەی سەربان و حەوشە لە گەڵا و عەلاگە و مەقابا، بۆئەوەی تا لە کاتی باران باریندا نەچنە بەردەم مەنھۆڵ و گونجەکان.

٥- ئەو ماڵانەی لە گەڕەکی لاوەکیدان ئاوی شەقامێکی سەرەکی دێتەوە سەری، پێویستە رێڕەوی ئاوەکە بگۆڕن بۆجێگەیەکی گونجاوتر لە رێگەی فەردە لم، یان تاسە دانان بە کۆنکرێت ئاستی بەرزی و نزمی تاسەکە لە ژێر چاودێری یاساکانی ھاتوچۆدا.

٦- کوژانەوەی سەرچاوەی کارەبا لەو جێگەیەی ئاوی تێدا کۆبووەتەوە و ئەندامانی خێزانەکە قاچیان لە ناوی دایە و خەریکی دەرھێنانی ئاوەکەن، چونکە مەترسیدارترین رووداو ئەوەیە ئاو بگاتە ئاستی سویچ پلاک و کارەبا بچێتە سەر ئاوەکە.

٧- ئەو ماڵانەی ساڵانە دووچاری ھاتنە ژوورەوەی لافاو دەبن و ھیچ ئامادە سازیەکیشیان لەم رێنماییانە نەکردووە بۆ خۆپاراستن، پێویستە کەلوپەلی کارەبای بەنرخ و ئاڵتون و پارە لە جێگەی نزمدا دانەنێن، تاوەکو رووداوەکەش روویدا زەرەروو زیان کەمتر بێت.

٨- سەلامەتی خۆت و ماڵ و مناڵ و ئەندامانی خێزانت لە پێش ھەموو شتێکەوەیە گەر ھیچت پێ نەکرا باشترین شت ئەوەیە بێیتە دەرەوە بچیتە جێگەیەکی پارێزراو.

٩- ئەو ماڵانەی سەربانیان گڵ و دارە، پێویستە بە زووترین کات بێنە دەرەوە و نەمێننەوە لە ژێریا، چونکە مەترسی تەپین و رووخانی ھەیە.

لەبەشێکی دیکەی راگەیەنراوەکەی بەرگری شارستانی سلێمانیدا ھاتووە، ئەو ئەرکانەی لەسەرشانی حکومەتە و پێویستە ئەنجامیان بدات، بریتین لە ساڵانە مەنھۆڵی گەڕەکەکان لە رێگەی لایەنی پەیوەندیدارەوە پاک بکرێتەوە، چونکە زۆربەی مەنھۆڵەکانی شار لـم و قـوڕ و لیتە پــڕی کردوونەتەوە و گیراون و زۆربەیان سەرە مەنھۆڵەکەش دیارنەماوە و بووە بە جادە.

ئاماژەی بەوەشداوە، پێویستە بەردەوام پەیوەنیان لەگەڵ کەشناسیدا ھەبێت و پێشوەخت ھاوڵاتیان ئاگاداربکەنەوە لە ئەگەری روودانی ھەر لافاوێک.

ئەوەش لەکاتێکدایە، دوو مانگی رابردوودا تاوەکو ئێستا سێ جار لافاو لە شاری هەولێر روویداوە و بەهۆیەوە زیانێکی زۆری ماددی و گیانی بەر هاوڵاتیان کەوتووە و لە لافاوەکەی مانگی رابردووشدا ١٢ کەس گیانیان لەدەستدا، کە هێشتا تەرمنی منداڵێکی ١٠ مانگان بێسەروشوێنە.

بەهۆی لافاوەکەی هەولێرەوە بەشێک لە هاوڵاتیانی هەولێر زیانی زۆریان بەرکەوتووە و ئاماژە بەوە دەکەن، ماوەی ٣٠ ساڵە حکومەتی هەرێم نەیتوانیوە کێشەی ئاوەڕۆی هەولێر چارەسەر بکات و لە ئێستاشدا رەخنەی ئەوەیان هەیە، بەهۆی هەندێک پرۆژەوە رێڕەوی ئاوەڕۆی هەولێر گۆڕاوە و بۆیە ئەمساڵ رووبەڕووی زیانی لەو جۆرە دەبنەوە.