PM:11:41:17/12/2025
1112 جار خوێندراوەتەوە
وەزارەتی دەرەوەی عێراق هەڵوەشاندنەوەی بڕیارەکانی بەکارهێنانی هێزی سەربازی دژی عێراق لەلایەن کۆنگرێسی ئەمەریکاوە بە خاڵێکی وەرچەرخان وەسف کرد و دەڵێت، ئەم بڕیارە پەیوەندییەکانی نێوان بەغدا و واشنتن دەباتە قۆناغێکی نوێوە.
ئەمڕۆ چوارشەممە ١٧ـی کانوونی یەکەمی ٢٠٢٥، وەزارەتی دەرەوەی عێراق لە راگەیەندراوێکدا، پێشوازیکرد لە دەنگدانی هەردوو ئەنجومەنی نوێنەران و ئەنجوومەنی پیرانی ئەمەریکا کرد، کە تیایدا کۆتاییان بە بڕیارەکانی بەکارهێنانی هێزی سەربازی دژی عێراق هێنا کە پەیوەست بوون بە جەنگەکانی ساڵی ١٩٩١ و ٢٠٠٢.
لە راگەیەندراوەکەدا
هاتووە، ئەم هەنگاوە لە چوارچێوەی پڕۆژەیاسای بەرگریی نیشتمانیی ئەمەریکا بۆ ساڵی ٢٠٢٦
بووە و ئێستا چاوەڕێی دۆناڵد ترەمپ، سەرۆکی ئەمەریکا دەکرێت بۆ پەسەندکردنی.
لە بەشێکی
دیکەی راگەیەندراوەکەدا ئاماژە بەوەکراوە، "ئەم بڕیارە کۆتایی بە میراتی جەنگ
دەهێنێت و پەیوەندییەکانی نێوان بەغدا و واشنتن دەباتە قۆناغێکی نوێوە کە لەسەر
بنەمای رێزگرتن لە سەروەریی عێراق و هاوبەشیی ستراتیژی دەبێت، هەروەها پەیامێکە بۆ
جیهان کە عێراق ئێستا ژینگەیەکی ئارامە بۆ وەبەرهێنان".
ئەوەش دوای
ئەوەی ئەنجوومەنی پیرانی ئەمریکا بە زۆرینەی دەنگ بودجەی ساڵانەی بەرگریی وڵاتەکەی
پەسند کرد و یەکێک لە بڕگەکانیش هەڵوەشاندنەوەی فەرمی رێگەپێدانی بەکارهێنانی هێزی
سەربازی (AUMF) بوو کە لە ساڵانی ١٩٩١ و ٢٠٠٢ بۆ جەنگی دووەمى
کەنداو جەنگی عێراق بە حکومەتی ئەمریکا درابوو.
