AM:10:07:22/07/2025
2900 جار خوێندراوەتەوە
وەزارەتی دارایی و ئابوری حکومەتی ماوە بەسەرچووی هەرێم رایگەیاند، بڕی ١٢٠ ملیار دینار داهاتی نانەوتی خراوەتە سەر هەژماری بانکی وەزارەتی دارایی حکومەتی فیدڕاڵ.
ئەمرۆ سێشەممە ٢٢ـی تەممووزـی ٢٠٢٥، وەزارەتی دارایی و ئابوری حکومەتی ماوە بەسەرچووی هەرێم بڵاویکردەوە، بەشی گەنجینەی فیدراڵی لە داهاتی نانەوتی هەرێمی کوردستان بۆ مانگی ئایاری ساڵی ( ٢٠٢٥ ) کە بڕەکەی، ١٢٠ ملیار دینارە، خرایە سەر هەژماری بانکی وەزارەتی دارایی حکومەتی فیدراڵ.
ئاماژە بەوەشکراوە، پارەکە بەشێوەی کاش خرایە سەر هەژماری بانکی وەزارەتی دارایی حکومەتی فیدراڵ لەلقی هەولێری بانکی ناوەندی عێراق.
ئەمە لەکاتێکدایە، بەپێی ڕێککەوتنی نێوان هەرێم و بەغدا پێویستە مانگانە حکوومەتی ماوەبەسەرچوو بڕی ١٢٠ ملیار دینار داهاتی ناوخۆ و رۆژانە ٢٣٠ هەزار بەرمیل نەوت رادەستی بەغدا بکات پاشان مووچە دەنێردرێت.
جێی ئاماژە پێدانە، سەرچاوەیەکی باڵا لە حکومەتی فیدڕاڵ بە نەوەی نوێی وتبوو، کە ئەمڕۆ بەغدا پارە دەنێرێت بۆ مووچەی مانگی پێنج تا بەسەر فەرمانبەران و مووچەخۆرانی هەرێم دابەشبکرێت.
