پارێزگاری هەولێر دەڵێت، هاتووچۆی بازرگانی له ده‌روازه سنوورییه‌كانی هەرێم ئاساییه و رێگه ناده‌ن ناسه‌قامگیریی ناوچه‌كه بۆ گرانكردنی نرخی كاڵاكان بقۆزرێته‌وه.
ئەمڕۆ شەممە ١٤ـی حوزەیرانی ٢٠٢٥، ئومێد خۆشناو، پارێزگاری هه‌ولێر لە لێدوانێکی رۆژنامەوانیدا لەبارەی کاریگەریی شەڕی ئێران و ئیسرائیل لەسەر كەلوپەلی خۆراك و بازاڕ وتی، رێگه ناده‌ن ناسه‌قامگیریی ناوچه‌كه بۆ گرانكردنی نرخی كاڵاكان بقۆزرێته‌وه.
ئاماژەی بەوەشکرد،
هیچ كێشەیەك نییە و پێویست بە دڵەڕاوكێ ناكات، چونكە سنوورەكان كراوەن و ئاڵوگۆڕیی
بازرگانی بەردەوامە، جگە لەوە لە كۆگا بارزگانییەكان و كۆگاكانی دیكەش، خۆراكی زۆر
هەیە و بەشی ماوەیەكی زۆر دەكات.
باسی لەوەشکرد،
هەوڵ هەبووە كەلوپەل و خۆراك لە بازاڕی هەولێر گران بكرێت، بەڵام لیژنەكانی
چاودێریی بازاڕ گەڕان و پشكنینەكانیان چڕ كردەوە و كاری خۆیان كردووە كە ئەو
بارودۆخە نەقۆزێتەوە بۆ گرانكردنی بازاڕ.
وتیشی، رەنگە
نرخی دۆلار كاریگەریی بۆ سەر بازاڕ و كەلوپەل هەبێت، بەڵام كە سنوور كراوە بێت و
خوراك بگاتە كوردستان، پێویست بە دڵەڕاوكێ ناكات و هەرێمی
كوردستان لە شەڕی ئیسرائیل و ئێران تێوەنەگلاوە و هیچ گرفتێكی نییە.
لەبارەی گەشتە
ئاسمانییەكانیشەوە ئەوەی خستەڕوو، وەستانی گەشتەكان و داخستنی ئاسمان تەنیا هەرێمی
كوردستان نییە و عێراق و وڵاتانی دەوروبەریشی گرتووەتەوە، هەرچەندە خەریكە وڵاتانی
دەوروبەر گەشتەكان دەست پێ دەكەنەوە و حكومەتی ماوەبەسەرچوو ئاسانكاری بۆ هەر
هاوڵاتییەكی كوردستان دەكات، ئەگەر لە دەرەوەی وڵات گیری خواردبێت.