رۆژنامەی فایناشناڵ تایمز دەڵیت کار گەیشتبوو بەوەی بەبێ پشکی ئەمسا، هیچ بزنس‌و مامەڵەیەکی بازرگانی لە سوریا‌ سەرینەدەگرت، و ئەو هیچ پارچە زەوییەک بە کەس نەدەدا، بازرگانێك بە رۆژنامەکەی وتبوو "هەموو سوریا موڵکی ئەسمایە".

رۆژنامەکە بڵاویکردووەتەوە "ئەسما دەستی خستبووە هەموو کەرتە جیاوازەکانی ئابوورییەوە و لەڕێگەی هاوبەشەکانیەوە لەهەموو سێکتەرەکاندا پشکی هەبوو - پەیوەندییەکان، خانووبەرە، بانک‌ و بازرگانی ‌و پیشەسازی – هەموویانی کۆنتڕۆڵ کردبوو، لەکاتێکدا بەپێی داتاکانی بانکی نێوەدەوڵەتی ٩٠٪ـی هاوڵاتیانی سوریا لەپیویستیەکانی ژیانیان بێبەش بوون.

ئەسما فەواز ئەخرەس کچی پزیشکێکی ناوداری سوریایە و خەڵکی شاری حومسە، دایکیشی فەرمانبەری باڵیۆزخانەی سوریابوو لە لەندەن.

ئەسما ساڵی ١٩٧٥ لە لەندەن لەدایکبووە و ١٠ ساڵ لەبەشاری هاوسەری گەنجتر بوو بڕوانامەی زانستی کۆمپیوتەری لەزانکۆی لەندەن بەدەستهێناوە، لەدامەزراوە بانکییەکانی وەک جەی پی مۆرگان لەنیویۆرک کاری کردووە.

بەشار ئەسەد ساڵانی ١٩٩٢ – ١٩٩٤و وەک پزیشکی چاو لە لەندەن بووە، لەنەخۆشخانەکەی باوکی ئەسمادا، ئەسمای ناسیوە و ئەسماش لەوکاتەدا بەنیازی خوێندن بووە لەزانکۆی هارڤاردی ئەمریکا، بەڵام هاوسەرگیریی لەگەڵ بەشار ئەسەد دەکات و دەگەڕێتەوە بۆ سوریای زێدی باپیرانی، ئەسما لەچاوپیکەوتنێکدا وتویەتی " کێ هەیە خۆشەویستی نەخاتە پێش هارڤاردەوە؟

ساڵی ٢٠٠٠، بەشار و ئەسما هاوسەرگیریان کرد و لە هەمان ساڵیشدا حافز ئەسەد کۆچی دوایی کردو بەشار جێگەی گرتەوە و ئەسما بووە خانمی یەکەمی وڵات، هەرچەندە هەندێک چاوەروانی ئەوەیان دەکرد، ئەسما کاریگەری هەبێت لەسەر کرانەوەی سوریا بەڕووی جیهان و کۆتایی حکومڕانی دیکتاتۆریەت بەڵام پێچەوانەکەی دەرچوو، ئەسما بووە یەکێک لە کۆڵەکەکانی رژێمەکەی بەشار.

ئەسما کە بە ژنە کەشخەکە ناسراوبوو لە دیمەشق چێژی لەچوونە دەرەوە لەگەڵ هاوسەرەکەی و خواردن ‌و لێخوڕینی ئۆتۆمبێل دەبینی و لەسەر حسابی خەڵکی ولاتەکەی لە ژیانێکی شاهانەدا بوو بەڵام ئێستا هەموو شت گۆڕدراو و ئێستا وەک پەناهەندەیەک لە مۆسکۆ وڵاتی بەفر و سەرما دەبێت تا دواین ساتەکانی ژیانی وەک پەنابەر بەڕێبکات.