بڕیارە سودانی لەسەردانەکەیدا دۆسیەکانی پرسی پێکهیێنانی حکومەتی نوێ و موچە و بودجەی هەرێم و پرسی نەوت و چەند دۆسیەیەکی دیکەی نێوان هەرێم و بەغدا لەگەڵ بەرپرسانی هەرێم و بەشێک لە بەرپرسانی باڵای لایەنەکان تاوتوێ بکات.

شەوی رابردووش، بەرپرسێکی باڵای نزیک لە سودانی بە ئێن ئاڕ تی راگەیاند، سبەینێ سودانی دێتە هەرێمی کوردستان و بڕیاری خەرجکردنی مووچەی مانگی ١٠ دەدات. وتیشی، لە سەردانەکەی سودانیدا بۆ هەرێم کێشەی موچە چارەسەر دەکرێت.

باسی لەوەش کرد، سەرۆک وەزیرانی عێراق کێشەی مووچە چارەسەر دەکات و گوژمەی پارە بۆ چارەسەری مووچەی مانگی ١٠ دەنێرێت، هەرچەندە کێشەی مووچەی هەرێم ئاڵۆزە و پێویستی بە کاتە بۆ چارەسەرکردنی.

ئەوەشی خستە روو، سەرۆک وەزیرانی عێراق بەڵێنەکانی لەبارەی چارەسەری کێشەی مووچەوە دەباتە سەر و مووچەخۆرانی هەرێم هیچ تاوانێکیان نییە و ئەرکی سەر شانی هەرێم و بەغدایە کێشەی مووچە چارەسەر بکەن.

دەشڵێت، "مژدە دەدەمە مووچەخۆرانی هەرێم سبەی سودانی کێشەی مووچە بەشێوەیەکی کاتی چارەسەر دەکات و پێم وا نییە کێشەی مووچە چارەسەری نەبێت چونکە لە هەردوو لاوە نیازپاکی هەیە بۆ چارەسەر".