نرخی نەوت لە بازاڕەکانی جیهاندا دابەزینی بەخۆیەوە بینی و بەرمیلێک نەوتی خاوی برێنتیش بە ٧٤ دۆلار و ٥٦ سەنت مامەڵەی پێوە دەکرێت.
ئەمڕۆ چوارشەممە، بە گوێرەی پێنوێنیی جیهانی، نرخی بەرمیلێک نەوتی رۆژئاوای تێکساس بە ٧١ دۆلار و ١٠ سەنت مامەڵەی پێوە دەکرێت، هاوشێوەی نەوتی برێنت نرخەکەی بەراورد بە دوێنێ دابەزیوە.
لە دوو رۆژی رابردوودا، ئەندامانی رێکخراوی ئۆپیک پڵەس بەهۆی نیگەرانییەکانیان
سەبارەت بە خراپتربوونی ئاماژە ئابورییەکان و دابەزینی نرخی نەوت، زیادکردنی بەرهەمهێنانی
نەوتیان بۆ مانگێکی دیکە دواخست و بڕیارە لە مانگی یەکی ساڵی ئایندە دەست بکەن بە
زیادکردنى بەرهەمهێنانی نەوت.
ئەمەش دوای ئەوە دێت، رێکخراوەکە لە کۆبوونەوەی پێشووتریدا بڕیاری
دابوو کە بەرهەمهێنانی نەوت لە مانگی ١٢ـی ئەمساڵ نزیکەی ١٨٠ هەزار بەرمیلی دیکە لە
رۆژێکدا زیاد بکات.
لە کۆتاییەکانی مانگی رابردوودا نرخی نەوت لە جیهاندا بە شێوەیەکی بەرچاو
دابەزینی بەخۆیەوە بینی، بەجۆرێک، نرخی بەرمیلێک نەوتی خاوی برێنت گەیشتە نزیکەی
٦٧ دۆلار، بەڵام دوای هێرشە مووشەکییەکەی ئێران بۆ سەر ئیسرائیل و ناجێگیریی دۆخی
رۆژهەڵاتی ناوەڕاست، نرخی نەوت بەشێوەیەکی بەرچاو رووی لە بەرزبوونەوە کرد.