هەر لەو بارەیەوە، وەزارەتی دارایی عێراق بە ئێن ئاڕ تی راگەیاند، تەمویلی تەواوی مووچەی مانگی نۆی مووچەخۆرانی هەرێمیان ناردووە، لە ئێستاشدا هەرێم داوای پارەی دیکەیان لێ دەکات.

پێشتریش پەیامنێری ئێن ئاڕ تی لە بەغدا باسی لەوە کرد، شاندێکی وەزارەتی دارایی حکومەتی کاربەڕێکەری هەرێم لە بەشی ژمێریاری و بودجەی وەزارەت زنجیرەیەک کۆبوونەوەیان لەگەڵ بەشی ژمێریاری وەزارەتی دارایی عێراق و وەزیری دارایی عێراق کردووە و لە کۆبوونەوەکاندا داوای ٢٥٠ ملیار دیناری دیکەیان کردووە بۆ مووچەی مانگی نۆ.

لەبارەی مووچەی مووچەخۆرانی هەرێمەوە وەزیری دارایی عێراقیش رایگەیاند، لە دوای بڕیارەکەی دادگای فیدڕاڵی بۆ پێدانی مووچەی مووچەخۆرانی هەرێم، حکومەتی کاربەڕێکەری هەرێم پابەندی رادەستکردنی هیچ داهاتێکی نەوتی نەبووە بە بەغدا.

تەیف سامی وەزیری دارایی عێراق ئاماژەی بەوەش کرد، بەپێی بڕیارەکە حکومەتی عێراق بەردەوام پارەی مووچەی بۆ هەرێم ناردووە و پارەی مووچەی ساڵانەى هەرێمیش بۆ ١٣ ترلیۆن دینار زیادی کردووە، بەڵام دەسەڵاتدارانى هەرێم هیچ داهاتێکی نەوتییان نەگەڕاندووەتەوە بۆ بەغدا.

ئەوە لەکاتێدایە، حکومەتە کاربەڕێکەرەکەی پارتی و یەکێتی، دوو هەفتەیە دەستى گرتووە بەسەر نزیکەى ترلیۆنێک دینارى بەغدا و ئامادە نییە لیستى مووچەى مانگى نۆ رابگەیەنێت.