ئاماژە بەوەشکراوە، ئەوانەی دانیشتووی شارەكانی هەڵەبجە و كەلار و راپەڕین و سەیدسادقن سەردانی بانكەكانی شارەكانی خۆیان بكەن و داواشیان لێدەکات، سەردانی زانکۆ نەکەن.

زانکۆی سلێمانی ئەوەشی خستووەتەڕوو، پێویستە دەرچووان بەڵگەنامەی رەسەن "ئەسڵی" ببەن، وەک کارتی نیشتیمانی و پێناسی باری شارستانی. داواش دەکات، تاوەکو ٦ی ئەم مانگە مامەڵەکانیان تەواو بکەن.

لەلایەکی دیکەشەوە زانکۆی پۆلیتەکنیکی سلێمانی رایگەیاندووە، ئاگاداری سێ یەکەمەکانی ساڵانی ٢٠١٧-٢٠٢٣ی زانکۆکەیان دەکەنەوە، تاوەکو ٦ی ئەم مانگە ئەم رینماییانە جێبەجێبکەن:

١. دەرچووانی یەکەم و دووەم و سێیەمی بەشەکانی کۆلێج و پەیمانگەکانی سەنتەری پارێزگای سلێمانی سەردانی بەڕێوەبەرایەتی تۆماری گشتی زانکۆ بکەن بەمەبەستی وەرگرتنی وێنەیەک لە نووسراوی زانکۆمان و دواتر سەردانی یەکێک لە بنکەکانی بایۆمێتری بکەن بۆ پشکنینی بایۆمێتری.

٢. دەرچووانی یەکەم و دووەم و سێیەمی بەشەکانی کۆلێج و پەیمانگەکانی هەڵەبجە، دەربەندیخان، کەلار، دوکان، چەمچەماڵ، سەردانی بەڕێوەبەرایەتی تۆماری گشتی یان هۆبەی تۆماری کۆلێج و پەیمانگەکانیان بکەن بەمەبەستی وەرگرتنی وێنەیەک لە نووسراوی زانکۆمان و دواتر سەردانی یەکێک لە بنکەکانی بایۆمێتری بکەن بۆ پشکنینی بایۆمێتری.

ئەوەش هاتووە، بانکەکان ئەمانەن:

١.بانکی چەمچەماڵ، بەرامبەر کتێبخانەی گشتی چەمچەماڵ.

٢. بانکی هەڵەبجە، بەرامبەر شارەوانی هەڵەبجە.

٣. بانکی مەڵکەندی، گەڕەکی کوردسات .

٤. بانکی گەرمیان، لە کەلار.

دەشڵێت، پێویستە دەرچووان ئەم پێداویستییانەیان پێبێت:

١. کۆپیەک لە نووسراوی سەرۆکایەتی زانکۆ کە ئاراستەی وەزارەتی خوێندنی باڵا و توێژینەوەی زانستی کراوە و ناوی دەرچووەکەی پێوە هاوپێچ بێت.

٢. کۆپی رەسەن لە کارتی نیشتمانی و پاسپۆرت.

٢٩ی مانگی رابردوو، عەباس ئەکرەم، وتەبێژی وەزارەی خوێندنی باڵای حکومەتی کاربەڕێکەر لەبارەی ناوی سێ یەکەمەکانەوە بە ئێن ئاڕ تی راگەیاند، ناوی سێ یەکەمەکانی زانکۆ و پەیمانگاکانی هەرێم ئامادە کراوە و بە مەبەستی دامەزراندنیان رەوانەی بەغدا دەکرێن .

باسی لەوەش کرد، داوا کراوە بە گوێرەی خشتەیەک ئەو خوێندکارانە کە ژمارەیان ١٢ هەزار و ٢٢٧ کەسە و دانەمەزراون، رێکارە کارگێرییەکانی دامەزراندنیان بۆ ئەنجام بدرێت، لەگەڵ بڕی ئەو مووچەیەی کە دامەزراندنیان بۆ دەکرێت و دوای تەواوبوونی خشتەکان رەوانەی بەغدا دەکرێت. وتیشی، "لە ئێستادا وردبینی لیستی ناوی سێ یەکەمەکان بەردەوامی هەیە و لەگەڵ ئەنجومەنی راژەی عێراقیش بۆ ئەو مەبەستە لێکتێگەیشتنەکان ئەرێنین".