ئاماژەی بەوەشکرد، چەند بازرگانێک و توێژەکانی دیکە توانای بەشداریکردنیان لە سەکۆی ئەلکترۆنی دراوەکان نییە و بۆ ئەنجامدانی چالاکی و کاروباری نەختینەیی و لە هەوڵدان کە هەموو جێن و توێژەکان هانبدەن بۆ ئەوەی دۆلار لە سەرچاوەیەکی سەرەکی و یاسایی بکڕن کە ئەویش سەکۆی ئەلکترۆنییە.

ئەوەشی خستەڕوو، جگە لەو ١٤ بانکە هیچ بانکێکی دیکە لەلایەن ئەمریکاوە سزانەدراوە و ئەوانیش بەدواداچوون بۆ ئەو بانکانە دەکەن کە مامەڵەی دۆلاریان لێقەدەغەکراوە و پرۆسەیەکی گونجاوی بازرگانی لەگەڵ ئێران دادەنرێت و میکانیزیمی ئاڵوگۆڕ و پارەدان کێشە بۆ هیچ لایەنێک دروست نەکات.

باسی لەوەشکرد، قەبارەی قەرزە ناوخۆییەکانی عێراق ٦٥ ترلیۆن دینارە و ٤٦ ترلیۆنیان دەگەرێتەوە بۆ بانکی ناوەندی و ئەوی دیکەی هی بانکە حکومییەکانە و قەبارەی قەرزە دەرەکییەکانیش ٢٠ ملیار دۆلارە.

لە بارەی کۆپی ٢٠ هەزار دینارییەوە ئەوەی ئاشکرا کرد، چاپکردنی کۆپی ٢٠ هەزار دینارییان لە کارخستووە، چونکە لە بنەڕەتدا خاوەنی کۆپی ٢٥ هەزار دینارین و نایەنەوێت کۆپی دراوەکان فراوان بکەن و پڕۆژەی سڕینەوەی سفرەکانی دیناریش هێشتا دانەرێژراوە.

لە رێکەوتی ١٩ی مانگی تەموز بەهۆی حەواڵەکردنی دۆلار بۆ ئێران و ئەو وڵاتانەی لەلایەن وەزارەتی گەنجینەی ئەمریکاوە سزادراون، ئەمریکا سزای بەسەر ١٤ بانکی عێراقیدا سەپاند.

دواتر بانکی ناوەندی پەیامێکی ئاڕاستەی ئەو بانکە سزادراوانە کرد و رایگەیاند، ئەو بانکانەی بێبەشن لە مامەڵەکردن بە دۆلاری ئەمریکی ئازادی تەواویان هەیە مامەڵە بە دیناری عێراقییەوە بکەن و جگە لە دۆلار دەتوانن مامەڵە بە دراوەکانی دیکەشەوە بکەن.

لە ئێستادا نرخی ١٠٠ دۆلار لە بازاڕی دراوەکانی شاری سلێمانی بەرامبەر بە ١٥٦ هەزار و ٥٠٠ دینارە.