وتیشی، رۆژانە لە نێوانیاندا شەڕ و پێکدادان هەبووە و دوای ئەوەی بەڕێوەبەری پۆلیس هەردوو لای ئاگادار کردووەتەوە لەبری ئەوەی بە یاسایی کێشەکە چارەسەر بکات، بە شێوەیەکی عەشایەری چونەتە ناو کێشەکەوە و کێشەکەی رەوانەی دادگا نەکردووە.

ئاماژەی بەوەشکرد، کێشەکە دەگەڕێتەوە بۆ ١٠ ساڵ لەمەوپێش و لەو کاتەوە دوو کەس لە بنەماڵەکە کوژراوە و ئەو بنەماڵەیە بەردەوام هێرش دەکەنە سەریان.

خورشید هەرکی داواشی کرد، لە رێگای یاساوە کێشەکەیان بۆ چارەسەربکرێت و ئامادەن بۆ ئەوەی بچنە بەردەم دادوەر.

دەشڵێت، لە پێشتریشدا بوهتانی بۆکراوە و دوو ساڵ زیندانی کراوە.

خورشید هەرکی لە رێگای ئێن ئاڕ تییەوە پەیامێکی ئاڕاستەی دەزگاکانی راگەیاندن کرد و تیایدا داوای لێکردن، لە کاتی چاوپێکەوتن لەسەر ئەو دۆسییەیە کەسانی ئاگادار لە رووداوەکە بدوێنن نەک کەسانێک کە پەیوەندیان بە رووداوەکە نییە و بە پێچەوانەوە سکاڵایان لەسەر تۆمار دەکات.

بەهۆی نەبردنی کێشەکان بۆ ناو دادگا و بوونی چەک لەدەست هاوڵاتییانی مەدەنی و بەکارهێنانی چەکی هێزە ئەمنییەکان لە شەڕی نێوان بنەماڵەکاندا، ساڵانە بەهۆی کێشەی کۆمەڵایەتییەوە چەندین کەس گیان لەدەست دەدەن.

رزگار کۆچەر - هەولێر
ک - ک