پلاسخارت باسی لەوەشکرد، "پێویستە هەمووان پێکەوە هەوڵی چارەسەرکردن و دۆزینەوەی چارەسەرێک بدەین، عێراق خۆی بە تەنها لە توانایدا نییە کارێکی لەو شێوەیە بکات"، جەختی لەوەشکردەوە، عێراق پێویستی بە هاوکاری رێکخراو و دامەزراوە دارایی و ئابورییە نێودەوڵەتییەکان و وڵاتانی دراوسێ یان هەر وڵاتێکی دیکە هەیە.

دەشڵێت، "ئێمە لێرەین بۆئەوەی بتوانین کارێی هاوبەش پێکەوە ئەنجام بدەین، ئەوەی نەتەوەیەکگرتووەکان دەتوانێت پێشکەشی بکات ئەوەیە بتوانین هاوبەشێکی گرنگبین و گفتوگۆی بە بایەخ بکەین و هاوکاری تەکنیکی بۆ ئەو بابەتانە پێشکەش بکەین کە دانوستاندانیان لەبارەوە دەکرێت."

هاوکات، نێردەی نەتەوەیەکگرتووەکان ئەوەشی خستەڕوو، هەبوونی چەندین دەزگا و بودجە و بەرنامەی گەشەپێدان و بەرەوپێشەوەچوون بۆ پاڵپشتیکردنی عێراق و کەمکردنەوەی کاریگەرییەکانی گۆڕانی کەشوهەوا و تێچووەکانی گرنگییەکی گەورەی هەیە.

ئەمڕۆ یەکشەممە، بە بەشداری ژمارەیەک لە نوێنەرانی وڵاتانی ھەرێمی و نێودەوڵەتی، کۆنفرانسی عێراق بۆ ئاووھەوا لە بەسرە دەستی پێکرد کە دوو رۆژ دەخایەنێت.

لە میانی کۆنفرانسەکەدا، چۆنێتی چارەسەرکردنی کاریگەرییەکانی گۆڕانی ئاووھەوا لەسەر عێراق تاوتوێ دەکرێت.