وەزیری دارایی و ئابوری حکومەتی ماوەبەسەرچووی هەرێم بڕیاریدا بانکەکان لە رۆژانی پشودا کراوە بن بۆ دابەشکردنی پارەی گەنمی جوتیاران.
وەزارەتی دارایی و ئابوری حکومەتی ماوەبەسەرچووی هەرێم راگەیەنراوێکی بڵاوکردەوە و تیایدا هاتووە، بە بڕیاری ئاوات جەناب وەزیری دارایی و ئابوری لە رۆژانی پشودا بانکەکانی سەر بەوەزارەتی دارایی کراوە دەبن بۆ دابەشکردنی پارەی گەنمی جوتیارانی هەرێمی کوردستان.
ئەوەشی خستووەتەڕوو، چەند رۆژێکە
دابەشکردنی پارەی گەنمی جوتیاران لە پارێزگاکانی هەرێم دەستیپێکردوە و وەزارەتی
دارایی و ئابوریش بانکەکانی راسپاردوە هەموو کارئاسانیەک بۆ دابەشکردنی ئەو پارەیە
بکەن.
دەشڵێت، بڕی ئەو پارەیەی بەسەر جوتیاراندا دابەشدەکرێت
بریتییە لە ١٣٩ ملیار و ٦٨٧ ملیۆن دینار و تایبەتە بە شایستە داراییەکانی ٢٠١٥ی گەنمی
جوتیاران.
راگەیەنراوەکەی وەزارەتی
دارایی باسی لەوەشکردووە، شایستە داراییەکانی جوتیاران بە گوێرەی
پارێزگاکانی هەرێم بەم شێوەیە دابەشدەکرێت: پارێزگای هەولێر ٦٠ ملیار و ٥٦٩ ملیۆن
و ٧٤٨ هەزار دینار، پارێزگای سلێمانی ٤٤ ملیار و ١٢٩ ملیۆن و ٤٠٤ هەزار دینار،
پارێزگای دهۆکی ٣٤ ملیار و ٩٨٧ ملیۆن و ٩١١ هەزار دینار.