سەرۆکی ئەمریکا رایگەیاند، سەرکەوتنی ئۆکرانیا دووپات دەکەنەوە و گەرەنتی دەدەن کە روسیا لەم جەنگەدا سەرناکەوێت و هەرگیز پشتیوانیکردنی ئۆکرانیا نابێتە هۆی لاوازبوونی هاوپەیمانی ناتۆ.
جۆ بایدن سەرۆکی ئەمریکا لە وتارێکیدا لە وارشۆی پایتەختی پۆڵەندا کە بە بۆنەی تێپەڕبوونی نزیکەی ساڵیک بەسەر جەنگی نێوان روسیا و ئۆکرانیا وتارێکی پێشکەش کرد تیایدا رایگەیاند، هەڵگیرساندنی جەنگ و هێرشکردنە سەر ئۆکرانیا لەلایەن روسیاوە تاوانێکی گەورە بوو، ئەوەی گرنگە تا ئێستا ئۆکرانیا بەهێز و خۆڕاگرە.
ئاماژەی بەوەشدا، لەگەڵ سەرکردەکانی
وڵاتانی جیهان شان بە شان دەوەستن و پشتیوانی لە دیموکراسیەت دەکەن و بۆ سەرۆکایەتی
ئۆکرانیای دووپات دەکەنەوە کە بەردەوام پشتیوانی لەو وڵاتە دەکەن.
ئەوەشی خستەڕوو، لە ئێستادا
هاوپەیمانی ناتۆ لە هەموو کاتێک بەهێزتر و پتەوترە.
وتیشی، کاردەکەن بۆ ئەوەی
ئەوروپا سەربەخۆ بێت لە وزەی روسیا.
سەرۆکی ئەمریکا باسی لەوەشکرد،
ڤلادمیر پوتینی سەرۆکی روسیا گرەوی جیابوونەوەی وڵاتانی ناتۆی دۆڕاند و پشتیوانی ئەوان
بۆ ئۆکرانیا نابێتە هۆی لاوازی و هەڵوەشاندنەوەی ناتۆ.
دەشڵێت، "روسیا بەسەر ئۆکرانیادا سەرناکەوێت."
لە مانگی شوباتی ساڵی
رابردوو هێزەکانی روسیا هێرشیان کردە سەر ناوچەکانی ئۆکرانیا و هەتا ئێستاش ئەو جەنگە
بەردەوامە و وڵاتانی ئەوروپا و ئەمریکا چەندین سزای ئابوری و نێودەوڵەتییان بەسەر
روسیادا سەپاند.