سکرتێری گشتیی ناتۆ لە سەردانی داهاتوویدا بۆ پێشکەشکردنی پشتیوانی لە دوای بومەلەرزەکان بۆ تورکیا بە نیازە، فشار لە تورکیا بکات تا هەوڵەکانی سوید و فینلاند بۆ بوون بە ئەندام لە هاوپەیمانێتی ناتۆ پەسەند بکات.
بڕیارە یانس ستۆڵتنبێرگ سکرتێری گشتی ناتۆ، رۆژی پێنجشەممە واتە ئەمڕۆ سەردانی ئەنقەرە بکات و لەوێوە بڕوات بۆ ئەو ناوچانەی کە بەهۆی بومەلەرزەکەی هەفتەی رابردووەوە زیانێکی زۆریان بەرکەوتووە.
هاوتاکانی تورکیا لە ناتۆدا داوایان لە ئەنقەرە کردووە کە
واژۆ لەسەر داواکارییەکەی سوید و فینلاند بۆ بوون بە ئەندام لەو هاوپەیمانتێتییە
بکات.
بەئەندامبوونی ئەو دوو وڵاتە لە ناتۆ پەیوەستە بە واژۆی
هەر ٣٠ وڵاتی ئەندام تیایدا و پێویستە پەرلەمانی هەر ٣٠ وڵاتەکە داواکەی فینلاند و
سوید پەسەند بکەن بۆ ئەوەی ببنە ئەندام.
ئەوەی تا ئێستا هەیە، تورکیا و هەنگاریا تەنها دوو وڵاتی
ئەندامی ناتۆن کە ئەم داواکارییەیان پەسەند نەکردووە و ئەنقەرە پێشنیازی کردووە کە
دەتوانێت ئەندامێتی فینلاندا پەسەند بکات بەبێ سویدی دراوسێی.
ستۆڵتنبێرگ ئاماژەی بەوەکرد، تۆپەکە لە گۆڕەپانی تورکیادایە
بۆ ئەوەی پرۆسەکە بەرەو پێشەوە بچێت و دەڵێت، "دەکەوێتە سەر تورکیا، کە بڕیار
بدات کە ئایا هەردووکیان پەسەند دەکەن یان نا و منیش پێشنیازی ئەوەم کردووە."
بە گوێرەی قسەکانی سکرتێری گشتی ناتۆ، ریزبەندیکردنەکە
گرنگ نییە، گرنگترین شت ئەوەیە کە هەردوو وڵاتی فینلاند و سوید و بەم زووانە ببنە
ئەندامی هاوپەیمانییەکە.
پاش لەشکرکێشی روسیا بۆ ناو ئۆکرانیا، سوید و فینلاند هەردوو
وڵاتی باکوری ئەوروپا کە سنوری ئاوییان لەگەڵ روسیادا هەیە لە مانگی پێنجی ساڵی
٢٠٢٢ بڕیاریان دا دەستبەرداری بێلایەنی سەربازی بن و ببن بە ئەندام لە هاوپەیمانێتی
ناتۆدا.
تورکیا مەرجی هەبوو بۆ ئەو پرسە و نیگەرانە لەوەی سوید رەتیکردەوە
دەیان کەسی کە ئەنقەرە دەڵێت پەیوەندییان بە پەکەکە و هەوڵی کودەتا سەرنەکەوتووەکەی
ساڵی ٢٠١٦ هەیە، رادەستی تورکیا بکاتەوە.
لـ.لـ