لە کاتی داخستی بازاڕی دراوەکان لە هەرێم ١٠٠ دۆلار بە ١٧٢ هەزار مامەڵەی پێوەکرا و وتەبێژی بازاڕی دراوەکانی سلێمانیش بە ئێن ئاڕ تی راگەیاند، نرخی ١٠٠ دۆلار نەگەیشتووەتە ١٨٠ هەزار و جێگیرە.
جەبار گۆران وتەبێژی بازاڕی دراوەکانی سلێمانی بە ئێن ئاڕ تی راگەیاند، لەکاتی داخستنی بازاڕدا ١٠٠ دۆلار بە ١٧٢ هەزار مامەڵەی پێوەکراوە و نرخەکەی نەگەیشتووەتە ١٨٠ هەزار.
هاوکات هەر ئەمڕۆ لە دژی
بەرزبوونەوەی نرخی دۆلار هاوڵاتیان لە شاری بەغدا خۆپیشاندانیان کرد و داوای دابەزینی
نرخی دۆلاریان کرد.
ماوەی چەند هەفتەیەکە نرخی
دۆلار لە بازاڕەکانی هەرێم و عێراق ناجێگیرە و محەمەد شیاع سودانی سەرۆکوەزیرانی
عێراق داوای لە هاوڵاتیانی وڵاتەکەی کرد پارەکانیان نەگۆڕنەوە و بەڵێنی جێگیربوونی
نرخی دۆلاری دا بە هاوڵاتیان.
ئەمەش لە کاتێکدایە، بە
تۆمەتی بەقاچاخبردنی دۆلار بۆ وڵاتانی دراوسێ بانکی ناوەندی ئەمریکا رێکارەکانی
ناردنی دۆلاری بۆ عێراق توند کردووتەوە و داوای لە دەسەڵاتدارانی عێراق کردووە بەقاچاخبردنی
دۆلار بوەستێنن، بڕیاریشە رۆژی ٧ـی ئەم مانگە محەمەد شیاع سودانی سەرۆکوەزیرانی عێراق سەردانی ئەمریکا بکات و لەگەڵ بەرپرسانی بانکی ناوەندی ئەو وڵاتە کۆببێتەوە و
باس لە کێشەی ناجێگیری نرخی دۆلار بکەن.