مەزهەر ساڵح ئاماژەی بەوەشکردووە، "دەستتێوەردانی دەوڵەت لە بواری بازرگانی هاوردەکردندا چارەسەرێکی گشتگیری نیشتمانییە بۆ دابینکردنی سەقامگیری نرخ و رێگری لە قۆرغکاری بازرگانی کە ئاماژەی نەرێنی بەرەو سەقامگیری نرخی دیناری عێراقی دەنێرێت".

وتیشی، ئابووری بازرگانی حکومی چارەسەری یەکلاکەرەوە و سەقامگیرییە لە دوو ئاراستەدا کە:

یەکەمیان: دابینکردنی کاڵایەکی سەقامگیر و دڵنیاکردنەوەی کۆگاکانی کاڵا گرنگەکانە، بەتایبەتی کاڵا سەرەکییەکان؛ کە خواست لەسەریان کەمێک لاستیکییە و کاریگەری لەسەر بەکاربردنی رۆژانەی خەڵک دەبێت. هەروەها یارمەتیدەرە بۆ سەقامگیرکردنی پێوەرەکانی نرخی بەکاربەر و ئاستی ژیان و گوزەرانی هاوڵاتیان.

دووەمیان: زۆری ئەو کاڵایانە کە لە رێگەی بازرگانی حکومییەوە بە نرخی فەرمی ئاڵوگۆڕکردن دابین دەکرێن، ئۆفەرێکی قەرەبووکەرەوەی دراوی بیانییە و یارمەتیدەرە بۆ کەمکردنەوەی کەلێنی نرخی ئاڵوگۆڕ و کەمکردنەوەی کاریگەریی ئەم جیاوازییانە لە نرخی ئاڵوگۆڕدا؛ لە چاوەڕوانی هەڵئاوسانی داراییدا.

لە هەمانکاتدا، مەزهەر ساڵح جەختی لەوەشکردەوە، دەستوەردانی کاتی دەوڵەت لە ئابووریدا باشترین چارەسەرە تا ئەو کاتەی بازاڕی بازرگانی خۆی لەگەڵ کارەکانی هاوردەکردن لە بازاڕەکانی جیهان و شەفافیەتی داواکارییەکانی لەبەردەم دامەزراوەکانی پابەندبوونی دەرەکیدا دەگونجێنێت.