کاوە عەبدولقادر باسی لەوەکرد، "ئێمە ئاشکرامان کرد کە بەرزبوونەوەی نرخ هۆکارەکەی ئەو کۆمپانیا گەورانەن کە بازاڕیان قۆرغکردووە و سەر بە هەردوو حزبی دەسەڵاتدارن"، وتیشی، "هێنان و گواستنەوەی کولەپەل و خۆراک سەر بە کۆمپانیاکانی ئەو دوو حزبەن و رێنا نادەن خەڵکی دیکە بیهێنێت."

ئاماژەی بەوەشکرد، "یەکێکی دیکە لە هۆکارەکانی گرانی لە بازاڕدا باجی گومرگە لەسەر بازرگانان کە لە فڕۆکەخانەکان و خاڵە سنوورییەکان. جگە لە نەبوونی چاودێری لەلایەن حکومەتەوە کە بە دەیان کۆمپانیا خۆراک و کەلوپەلی ناتەندروست و بەسەرچوو دەهێننە ناو هەرێمەوە، سەرەڕای ئەوەی تەندروستی و پزیشکەکان هۆشداری دەدەن لە مەترسییەکەی بەڵام لە بازاڕدا بە ئاشکرا دەفرۆشرێت، چونکە لەلایەن بازرگانەکانی ئەوانەوە دەهێنرێت و کەس ناتوانێت کە رێگری لێبکات."

سەرکی فراکسیۆنی نەوەی نوێ ئەوەشی خستەڕوو، "دانیشتنەکەی ئەمڕۆ سەلماندی کە سەرۆکایەتی پەرلەمان و ئەو زۆرینەیەی پەرلەمان پابەندن بە بڕیارەکانی حزبەوە و پەرلەمانیان بێئەرزش کردووە، پارتی و یەکێتی بە مەبەست دەیانەوێت پەرلەمان بشکێنن و رۆڵی کەمبکەنەوە."

ئەوەش لە کاتێکدایە، ئەمڕۆ پەرلەمانی کوردستان کۆبووەوە و لە یەکێک لە پرسەکاندا باس لە گرانبوونی نرخی خۆراک و کەلوپەل لە بازاڕەکاندا دەکرا، بەڵام بە زۆرینەی دەنگ دەستەی سەرۆکایەتی پەرلەمان بڕیاریدا دانیشتنەکە برکێت بە داخراو و دوور بێت لە چاوی میدیاکان.

هـ.ئـ