ئەوەشی خستووەتەڕوو، "جا بۆیە هەم پارتی و یەکێتی ئەم هەنگاوەیان پێ ناخۆشە و حەزیان دەکرد هاوپەیمانی لەپێناو خەڵک کە خاوەنی ٢٨ کورسی پەرلەمانە، دەنگی بدایە بە کاندیدی لایەکیان"، دەشڵێت، "هەم هەندێک حیزبی تر و کەسایەتی و پەرلەمانتاری تری دەرەوەی ئەو دوو حیزبە پێیان ناخۆشە ئەم هەنگاوە یاخود رەنگە لێی تێ نەگەن، چونکە ئەوانە لەوەتەی هەن بەشێک بوون لە پارتی یان یەکێتی یاخود بەشێک بوون لە ئەجیندای باڵێکی ناو حیزبی دەسەڵات و هیچ کات بە تەنها روئیای خۆیان نەبووە و خاوەن بڕیاری سەربەخۆی خۆیان نەبوون."

سروە عەبدولواحید باسی لەوەشكردووە، "بۆیە لایەنەکانی دیکە ئێستاش لەوە تێ ناگەن کە کاندیدکردن تەنها لە پێناو ئەوەی گۆرەپانەکە بۆ پارتی و یەکێتی چۆڵ نەکەیت، زۆر جیاوازە لەوەی بە راستی پۆستی حکومەت وەربگریت و بچیتە ناو حکومەتەوە."

ئەو پەرلەمانتارەی نەوەی نوێ ئەوەشی خستووەتەڕوو، "کاندیدکردنی کەسێک بۆ نیشاندانی سەربەخۆیی خۆت و نەبوونت بە پاشکۆی لایەنی تر، هیچ کاریگەری لەسەر ئۆپۆزسیۆن بوونی نەوەی نوێ و هاوپەیمانی لە پێناو خەڵکدا نییە، کە بە دڵنیاییەوە بۆ چوار ساڵی داهاتوو ئۆپۆزسیۆنێکی چالاک دەبین لە ناو پەرلەمانی عێراقدا و پێشبینی دەکرێت کورسییەکانی ئەم هاوپەیمانییە بگاتە ٤٠ کورسی پەرلەمان."

ئەوەش لەکاتێکدایە، رۆژی یەکشەممەی رابردوو، پەرلەمانی عێراق یەکەم کۆبوونەوەی خۆی ئەنجامدا و تیایدا نەوەی نوێ کە هاوپەیمانی لەگەڵ بزوتنەوەی ئیمتیداددا هەیە، کاندیدی خۆی بۆ جێگری سەرۆکی پەرلەمان هەبوو، دوێنێش کانیدی خۆی بۆ سەرۆک کۆماری عێراق ئاشکراکرد.