بەغدا تا رۆژى سێ شەممەی ئەم هەفتەیەی مۆڵەت داوە بە هەرێم تا پابەندی رێککەوتنەکان بێت، چاوگێکیش لە حکومەتی ماوەبەسەرچوو وتی، ئەم هەفتەیە داهاتى ناوخۆ رادەست دەکەن و بڕیارە بەغداش مووچەى مانگی شەش بنێرێت.
ئەمڕۆ شەممە ٢٣ـی ئابی ٢٠٢٥، چاوگێک لە حکومەتی ماوەبەسەرچوو بە ئێن ئاڕ تی وت، ئەم هەفتەیە شاندەکانیان بە چڕی کاردەکەن بۆ تەواوکردنی هەنگاوەکانی جێبەجێکردنی رێکەوتنەکانی نێوان هەرێم و بەغدا، تا بتوانن هەر لەم هەفتەیەدا هەردوولا پابەندی ناوەڕۆکی رێکەوتنەکان بن.
وتیشی، بڕیارە
لەم هەفتەیە داهاتی نانەوتی رادەست بکەن و بەغداش مووچەی مانگی شەش بنێرێت، ئەم
دوو هەنگاوە لەلایەن هەرێم و بەغداوە ماوەتەوە سەر کاری لیژنەکان کە بەردەوامن و
تاوەکو ناوەڕاستی هەفتە زۆربەی یەکلای دەبێتەوە.
ئەمەش لەکاتێکدایە، بەپێی
نووسراوێک لە کۆبوونەوەى سێ شەممەى رابردووی ئەنجومەنی وەزیرانی عێراق، ناردنی
مووچەى مانگی شەش بەسترابوەوە بە چەند مەرجێکەوە.
یەکەم، ئەو لیژنە
هاوبەشانەى لە کۆبوونەوەى ١٧ـی مانگی رابردوو پێکهێنراون لەماوەى هەفتەیەکدا
کۆنووسی واژۆکراوی خۆیان بۆ ئەنجومەنی وەزیران ئامادە بکەن، لەسەر بە بانکیکردنی
مووچەی هەرێم (تەوتین) و چارەسەرکردنی کێشەی زیادەرەوی هەرێم لە پشکی خۆی لە بودجە.
دواکەوتنی مووچە لەدوای ئەوەدێت، نزیکەی ١١٣ رۆژە بەهۆی پابەند نەبوونی هەرێم بەو رێککەوتنانەی کە خۆی لەگەڵ بەغدا
واژۆی کردووە، مووچەخۆرانی هەرێم تەنها یەک مووچەیان وەرگرتووە و بارودۆخی
مووچەخۆران و کاسبکارانیش لە دۆخێکی خراپدایە.