سەرۆكی ئەمریكا و سەرۆكی روسیا پەیوەندییەكی تەلەفۆنێکی ٥٠ خولەكیان ئەنجامدا و بە وتەی راوێژكارێكی پوتنیش، باسیان لە پەرەسەندنی گرژییەکانی رۆژهەڵاتی ناوەڕاست و شەڕی بەردەوامی ئۆکرانیا کردووە.
ئەمڕۆ شەممە ١٤ـی حوزەیرانی ٢٠٢٥، یوری ئۆشاكۆف، راوێژکاری سەرۆکی روسیا لە بواری سیاسەتی دەرەوە و باڵێۆزی پێشوی مۆسكۆ لە واشنتن وتی، دۆناڵد ترەمپ، سەرۆکی ئەمریکا و ڤلادیمێر پوتن، سەرۆکی روسیا تەلەفۆنێکی٥٠ خولەكیان ئەنجامدا.
باسی
لەوەشکرد، ترەمپ و پوتن باسیان لە پەرەسەندنی گرژییەکانی رۆژهەڵاتی ناوەڕاست و
شەڕی بەردەوامی ئۆکرانیا کرد و پوتن ئۆپراسیۆنی سەربازی ئیسرائیلی دژ بە ئێران
شەرمەزار كرد و نیگەرانی خۆی لە دەرئەنجامە ناوچەییەکانی دەربڕی.
ئاماژەی
بەوەشکرد، سەرۆكی روسیا ئامادەیی وڵاتەكەی دوپاتکردەوە بۆ ئەوەی وەک نێوەنگیر لە
نێوان ئیسرائیل و ئێراندا مامەڵە بکات و ئامادەیە یارمەتی هەردوولا بدات بۆ
دەستپێکردنەوەی دانوستانەکان سەبارەت بە بەرنامە ئەتۆمییەکەی ئێران.
هەروەها،
بەدر بوسەعیدی، وەزیری دەرەوەی عومان ئەمڕۆ شەممە دوپاتیکردەوە کە خولی داهاتوی
دانوستانەکانی نێوان ئەمریکا و ئێران کە بڕیارە رۆژی یەکشەممە بەڕێوە بچێت، بەو
شێوەیەی کە دیاری کراوە ئەنجام نادرێت.
ئەمەش
لەکاتێکدایە، بەرەبەیانی دوێنێ هەینی، ئیسرائیل هێرشەکانی بۆ سەر ئێران دەستپێکرد
و بنکە ئەتۆمییەکانی کردە ئامانج، ئێرانیش هێرشەکانی شەوی رابردوو دەستپێکرد و تا
ئێستا هەردوولا بەردەوامن.