زۆر کەس گرفتی ئەوەیان هەیە کە زوو ددانیان زەرد دەبێت و کلس دەکات لە کاتێکدا گرنگی بە ددانەکانیان دەدەن و پاك رایدەگرن، ئەمەش بۆ چەند هۆکارێك دەگەڕێتەوە.
تروسکە عەبدوڵا پزیشکی ددان لەو بارەیەوە باس لەم حاڵەتە دەکات و دەڵێت: "سەرەتا دەبێت بزانیت زەردی و تاریکی رەنگی ددان زۆر کات بۆماوەییە و لە بنەرەتەوە وایە و بە شۆردن رەنگی ناگۆرێت، تەنھا چارەسەر ئەوەیە لەیزەری سپیکردنەوەی ددانی بۆ بکەیت یاخود کیفی جوانکاری بۆ بکەیت".
ئاماژەی بەوەکردووە، زۆربەی حاڵەتەکانی گۆرانی رەنگی ددانەکان و زوو دروستبوونی کلس ھۆکاری دەرەکین و لە گرینگی پێنەدان و فەرامۆشکردنەوە سەرچاوە دەگرن.
ئەو پسپۆڕە هۆکارەکانی بەمجۆرە خستووەتە ڕوو:
١-زۆر خواردنی جگەرە و چا و قاوە.
٢-شۆردنی ددان بەشێوەیەکی ھەڵە.
٣-لیکی کەسەکەش دەور دەبینێت و ھەندێک کەس لیکی خەستە یاخود لیکی کەمە و دەمی وشکە، ئەو کەسانە زیاتر ددانیان کلس دروست دەکات.
سەبارەت بە ھۆکارەکانی خەستی لیک ئەو پزیشکە ڕوونیکردووەتەوە:
١-چارەسەری شێرپەنجە بە تیشک/ چارەسەری کیمیایی
یەکێک لە کاریگەریە لاوەکییەکانی چارەسەرە تیشکییەکان بۆ تووشبووانی شێرپەنجەی سەر و مل بەکاردێن خەستبوونەوەی لیکە.
٢-وشکبوونەوە
یەکێک لە نیشانەکانی وشکبوونەوە بریتییە لە خەستبوونەوەی لیک.
٣-گیران و تەسکبوونەوەی بۆری لیکە ڕژێنەکان.
٣-کاریگەرییە لاوەکییەکانی دەرمان، ھەندێک جۆر دەرمان دوای بەکارھێنانیان دەبنە ھۆی خەستبوونەوەی لیک.
٤-تێکچوون و گرفتی لیکە ڕژێنەکان بەھۆی وەرەم یاخود لەکاتی نەشتەرگەریی.
ئەو پسپۆڕە بەمجۆرە چارەسەریی خەستی لیکی ئاشکراکردووە:
١-ڕۆژانە خواردنەوەی ١٠ کوپ ئاو.
٢-کەمتر خواردنی خۆراکە چڕەکان وەکو چەرەسات و خواردنی خۆراکە شێدارەکان.
٣-وازھێنان یان کەمکردنەوەی جگەرەکێشان.
ھەندێک جار گرفتی خەستی لیک بەو ڕێنماییەنەش چارەسەر نابێت، بۆیە پزیشک دوای دەستنیشانکردنی ھۆکارەکە چارەسەری ترت بۆ دادەنێت وەک:
-چارەسەر کردنی گیرانی بۆری لیکەڕژێن بە نەشتەرگەریی، بۆ لابردنی بەرد یان گرێ لە بۆری لیکە ڕژێنەکە
-بەکارھێنانی چەن جۆرێک دەرمان وەکو (پایلۆکارپین یاخود سەڵاجین، سێڤیمێڵین) بۆ شلکردنەوە یاخود ڕوونکردنەوەی لیک.
-گۆڕینی ئەو دەرمانەی کە بووەتە ھۆی خەستبوونەوەی لیک بۆ جۆرێکی تر لەلایەن پزیشکەوە.