ئاماژەی بەوەشکرد، نرخی کارەبای ٢٤ کاتژمێری لەگەڵ ئەو کارەبایەی ئێستا ھەیە تۆزێک جیاوازی ھەیە، چونکە پێشتر و ئێستاش حکومەتی ھەرێم لە پێدانی کرێی کارەبا پاڵپشتی ھاووڵاتیان دەکات، کە لەسەر حکومەت بە ١٥٦ دینارە بۆ ھەر کیلۆ واتێک، واتا حکومەت تەنھا ١٨ دیناری وەردەگرت و ئەوەی دیکە حکومەت دەیدا، ئێستاش کە بووەتە ٢٤ کاتژمێری کارەبا ناگاتە ئەو نرخەی حکومەت خۆی بەرھەمی دەھێنێت، بۆیە لەو پڕۆژەیەش حکومەت خۆی پاڵپشتی دەکات.

باسی لەوەشکرد، یەک دوو کەسی بەتەمەن باسیان لەوەکردووە ٥٠٠ ھەزار دیناریان بۆ گەڕاوەتەوە، دیار بوو لەوکاتەی کارەبای ٢٤ کاتژمێری ھەبووە کارەبای باشیشی بەکارھێنابوو ئەوەندەی بۆ ھاتبووە و یەکێکی دیکەش دووکاندارێک بوو وتبووی، پارەیەکی زۆری بۆ ھاتووەتەوە دیاربوو دووکانەکەی ئامێرێکی زۆری کارەبایی دانابوو، بۆیە بەپێی بەکارھێنانی کارەبا پارەیان بۆ دەگەڕێتەوە مانگانە.

وتیشی، ئەگەر خێزانێک ئێستا چوار ئەمپێر کارەبای مۆلیدە بەکار بهێنێت دەگاتە نزیکەی ٧٠ ھەزار دینار ئێستا بەو پارەیە ٢٤ کاتژمێر کارەبای بەردەوامت دەبێت و دەتوانی ھەموو ئامێرەکانی کارەباییش پێبکەیت و ئەگەر کەمتریش بێت کەمترت بۆ دێتەوە، بۆیە ئێستا پڕۆسەکە لە ھەولێر و سلێمانی و دھۆک و سۆران و سەنتەری شارەکان دەستیپێکردووە و تاوەکو ٢٠٢٦ ھەموو خەڵکی ھەرێمی کوردستان دەبێتە خاوەن کارەبای ٢٤ کاتژمێری.