حکومەتى کاربەرێکەر لە راگەیەندراوەکەى نیوەشەودا دەڵێت،حکومەتی عێراق ئامادەکاری دەکات بە شێوەیەکی تاکلایانە، نەوت و گازی ئەم ناوچانە ببات، لە کاتێکدا خەڵکی کوردستان و لە چوارچێوەی مادەی ١٤٠، داواکاری رەوای ئەم ناوچانە دەکات.

هەروەها دەشڵێت،حکومەتی فیدڕاڵی لە هەوڵی ئەوەدایە گرێبەستی نەوت و گاز واژۆ بکات، بەبێ ئەوەی مادەکانی دەستوور بە گشتی و بە تایبەت هەردوو مادەی ١٤٠ و ١١٢، لەبەرچاو بگرێت.

باسى لەوەشکردووە،هەرێم بە مافی دەستووريی خۆی دەزانێت، بە هەموو رێکارە جیاوازەکان کە دەستەبەر بێت، بەرگری لە مافە دەستوورییەکانی بکات و کار لەسەر جێبەجێکردنی یاساکان دەکات.

راگەیەندراوەکەى حکومەتى کاربەرێکەر وەک هەوڵێکى پێشوەختە دەخوێندرێتەوە بۆ سەردانەکەى سودانى، بەشێوەیەک کە هەرێمى کوردستانیش مافى ئەوەى هەیە قسەى هەبێت لە گاز و نەوتى سنورى ماددەى ١٤٠ دا.

سنورى ماددەى ١٤٠ خاوەنى بڕێکى زۆرى نەوت و گازە و لە سنورى پارێزگاى نەینەوا دەستپێدەکات تا رۆژهەڵاتى خانەقین لە پارێزگاى دیالە، لە ساڵانى ٢٠١٤ تا ٢٠١٧ لەژێر کۆنترۆڵى هەرێمدابووە و تاکلایەنە نەوتەکەى فرۆشتووە، بەڵام ئەوکاتەش حکومەتى هەرێم هەر نەیدەتوانى موچەى فەرمانبەران مانگانە و لەکاتى خۆیدا دابەشبکات.

ئێستا حکومەتى کاربەرێکەر کە پارتى و یەکێتى نوێنەرایەتى دەکەن هەوڵى وروژاندنەوەى پرسى نەوتى هەرێم و شەریکاتى نەوتى ناوچەکانى ماددەى ١٤٠ دەدات، لەکاتێکدا هەرێم هێشتا دۆسیەى نەوتەکەى لەگەڵ بەغدا یەکلایینەکردووەتەوە و لەو پارەیەشى کە بەغدا بۆ مووچەى ١٢ مانگى ٢٠٢٤ی ناردووە، تەنها ١١ مانگى دابەشکردووە.