بەپێی ئامارەکانی کۆمپانیایەکی بەریتانی تایبەت بە وزە، عێراق لە ماوەی مانگی تشرینی یەکەمدا بەرهەمهێنانی نەوتی بە نزیکەی ٦٠ هەزار بەرمیلی رۆژانە کەمکردووەتەوە.
ئەمڕۆ پێنجشەممە، کۆمپانیای S&P Global Commodity Insights بڵاوی کردەوە، لە مانگی تشرینی یەکەمی رابردوودا و لەسەر ئاستی مانگانە بەرهەمهێنانی نەوتی خاوی ئۆپێک بەڕێژەی ٣٠ هەزار بەرمیل لە رۆژێکدا بەرزبووەتەوە.
باس لەوەش کراوە، بەرزبوونەوەی بەرچاوی بەرهەمهێنانی نەوت لە لیبیا تا رادەیەکی زۆر بەهۆی کەمکردنەوەی نەوتی
کازاخستان و عێراق و ئێرانەوە هەڵوەشاوەتەوە.
ئاماژە بەوەش کراوە، عێراق بەرهەمهێنانی نەوتی بەنزیکەی ٦٠ هەزار بەرمیل لە رۆژێکدا
کەمکردووەتەوە و بەرهەمی گشتیی نەوتی وڵاتەکە چوار ملیۆن و ١٤٠ هەزار بەرمیل نەوت بووە لە رۆژێکدا، ئەمەش بە پلەی یەکەم بەهۆی کەمکردنەوەی قەبارەی هەناردەکردن و کارپێکردنی
پاڵاوتگەکانە.
هاوکات چاوگێکی ئاگاداریش بە کۆمپانیاکەی راگەیاندووە، ئەو هەشت وڵاتەی خۆبەخشانە نەوتیان کەم
کردووەتەوە بریتین لە، عێراق، جەزائیر، سعودیە، روسیا، عومان، کازاخستان، کوەیت و
ئیماراتی یەکگرتووی عەرەبی.
ئەمەش لە کاتێکدایە، پێشتر کارگێڕیی
زانیاری وزەی ئەمریکا رایگەیاندبوو، لە هەفتەی رابردوودا هەناردەی نەوتی عێراق بۆ
وڵاتەکەیان کەمی کردووە.