دواى سێ هەفتە لە دواخستن حکومەتى کاربەڕێکەر هەفتەى پێشوو لیستى مووچەى رەوانەى بەغدا کرد، بەڵام بەغدا رەتیکردەوە و ناردییەوە بۆ هەرێم و وتى لیستەکە بە رێکوپێکى ئامادە نەکراوە. هاوکات، ماوەى هەفتەیەکە حکومەتى کاربەڕێکەر لیستەکەى پاک نەکردووەتەوە و بەهۆیەوە دابەشکردنى مووچەى مانگى ١٠ دواکەوتووە.
نزیکەى هەفتەیەکە لیستى مووچەى هەرێم گەڕێندراوەتەوە و حکومەتى کاربەڕێکەر هێشتا ئەو تێبینیانەى چاک نەکردووە کە بەغدا داواى دەکات و بڕیارە لەم هەفتەیەدا جارێکى دیکە لیستەکە تەسلیمى بەغدا بکرێتەوە و پارەکە بنێردرێت.
چاوگێکى ئاگادار لە حکومەتى کاربەڕێکەرى
هەرێم بە ئێن ئاڕ تى راگەیاند، بەغدا تێبینى لەسەر چەند خاڵێکى لیستەکە هەبووە،
لەسەروو هەموویانەوە نەبوونى بایۆمەترى بەشێکى مووچەخۆران و ناڕێکى لیستى مووچەى
هێزە ئەمنییەکان لەگەڵ تێکەڵکردنى لیستى چەند وەزارەت و فەرمانگەیەک.
وتیشى، "لە چەند رۆژى داهاتوودا
دەستکارى لیستەکە دەکرێتەوە و جارێکى دیکە دەنێردرێتەوە".
لەلایەکى دیکەوە، ئیخڵاس دلێمى، ئەندامى
لیژنەى دارایی پەرلەمانى عێراق رایگەیاند، هەفتەى داهاتوو جارێکى دیکە بەغدا
دەستدەکاتەوە بە وردبینى لیستى مووچەى هەرێم و پارەى مووچەى مانگى ١٠ـش رەوانە
دەکات.
ماوەى ١١ مانگە حکومەتى کاربەڕێکەر هیچ
مانگێک بە دروستى لیستى مووچەى رەوانەى بەغدا نەکردووە و هیچ مانگێکیش لەکاتى
خۆیدا مووچەى دابەش نەکردووە.
خۆدزینەوەى حکومەتەکەى پارتى و یەکێتى لە مووچە
لەکاتێکدایە، داهاتى ناوخۆی هەرێم مانگانە ٤٥٢ ملیار دینارە بەپێى راپۆرتى حکومەت
خۆى و لە ١٣ مانگى رابردووشدا حکومەتى کاربەڕێکەر تەنها نۆ مووچەى دابەش کردووە و
هیچ کاتێکیش وەڵامێکى روونى ئەو پرسیارەى نەداوەتەوە کە بۆچى لە داهاتى ناوخۆ مووچە
دابەش ناکات.