PM:10:04:23/10/2024
1204 جار خوێندراوەتەوە
راوێژکارێکی سودانی رایگەیاند، لە دوو ساڵی رابردوودا حکومەتی عێراق توانیویەتی بە بەهای ١٠٠ ملیار دۆلار وەبەرهێننان بهێنێتە عێراق. وتیشی، بۆ ڕاکێشانی وەبەرهێنانی زیاتر شارێکی پیشەسازی و ئابوری بوونیاد دەنێن.
محەمەد نەجار راوێژکاری سەرۆک وەزیران بۆ کاروباری وەبەرهێنان بە ئاژانسی هەواڵی عێراقی ڕاگەیاند، حکومەتی عێراق بەم دواییانە گرێبەستی لەگەڵ کۆمپانیای ئەلیکتریکی سویدی کردووە و بەپێی پێشبینییەکان وەبەرهێنانەکانی ئەو کۆمپانیایە لە عێراق دەگاتە پێنج ملیار دۆلار و لە سەرانسەری عێراقدا بڵاودەبێتەوە.
ئەوەشی خستەروو، لە چوارچێوەی هەوڵەکایان بۆ راکێشانی وەبەرهێنان شارێکی
پیشەسازی و ئابووری بونیاد دەنێن، لە ئێستاشدا سەرقاڵی لێکۆڵینەوەن لەسەر سێ ناوچەی
لە ناوەڕاست و باشووری عێراق، لە داهاتوشدا گونجاوترین شوێن دیاری دەکەن و کار بۆ
دروستکردنی شارەکە دەکەن.
پێشتریش، سندوقی گەشەپێدانی عێراق ڕایگەیاند، ئامانجیان دامەزراندنی
سندوقێکی وەبەرهێنانی عێراقییە لەژێر ناوی (سندوقی یەکلاکردنەوە) بۆ ڕاکێشانی وەبەرهێنانی
ناوخۆیی و نێودەوڵەتی بۆ پەرەپێدانی پڕۆژەی ستراتیژی لە چەندین کەرتدا، هەروەها پەرەپێدانی
ئابووری لە بوارە جیاجیاکانی وەک کشتوکاڵ، پیشەسازی، و خزمەتگوزارییەکان بۆ کەمکردنەوەی
پشتبەستن بە نەوت.
