وەزارەتی پەروەردەی حکومەتی کاربەڕێکەر خشتەی خولی دووەمی تاقیکردنەوەی نیشتیمانی پۆلی ٩ی راگەیاند و بەپێی خشتەکە، لە رۆژی ٢٨ی ئەم مانگەوە تاقیکردنەوەکان دەستپێدەکەن.
بەپێی خشتەکە، رۆژی ٢٨ی ئەم مانگە، سێشەممە، تاقیکردنەوەکان دەستپێدەکەن و ریزبەندی خشتەکە بە هەمان شێوەی خولی یەکەم دەبێت.
لە رێنماییەکاندا هاتووە، رۆژانە کاتژمێر ٨ دەست بە
تاقیکردنەوەکان دەکرێت لە سەرجەم قوتابخانە حکومی و ناحکومی خۆماڵی و ئێواران و
خوێندنی خێرا و دەرەکیدا.
ئەوەش هاتووە، ئەگەر رۆژێکی تاقیکردنەوە بەر پشووی فەرمی
بکەوێت، ئەوا تاقیکردنەوەی ئەو رۆژە دەچێتە رۆژی دواتر و بە هەمان زنجیرە بەردەوام
دەبێت.
رۆژی ٧ی ئەم مانگە یەکەم خولی تاقیکردنەوەی نیشتیمانی
پۆلی ٩ لە هەرێم دەستیپێکرد و لە ١٤ی مانگدا تاقیکردنەوەکان تەواو بوون، لە
ئێستاشدا دەرگای پەڵپگرتن بە رووی خوێندکاراندا کراوەتەوە.
