ئەوەشی خستەڕوو، ئۆباڵی رێکنەکەوتن و نەچونی ئەو و بەشێکی دیکە لە ئەندامانی ئەنجومەنی باڵا یەکێتی بۆ پێنجەمین کۆنگرەی یەکێتی نیشتیمانی دەکەوێتە سەر مەکتەبی سیاسی ئێستای یەکێتی و بەتایبەت بافڵ تاڵەبانی سەرۆکی حزبەکە.

سەبارەت بە دەسەڵاتەکانی ئەنجومەنی باڵای یەکێتی ئاماژەی بەوەشکرد، ئەو پرۆژەی دەسەڵاتەکانی ئەنجومەنەکە نەنێردراوەتە بەردەستی ئەو و هەروەها بڕیار بووە ئەو ی هەڵدەبژێردرێن سەردانی بکەن، بەڵام ئەوانیش سەردانیان نەکردووە.

باسی لەوەشکرد، لە ئێستادا یەکێتی لەوپەڕی لاوازییدا دەرگا لەسەر رێککەوتن لەگەڵ لایەنەکانی دیکە و تەنانەت هەندێک بۆچونی دیکەی ناوخۆی یەکێتی دادەخات و ئەمەش زەنگێکی مەترسیدارە.

دەشڵێت، "یەکێتی بووەتە بەشێک لە شکستەکانی حکومەت و سەرئەنجامی ئەو شکستانەی لە حکومەتدا هەیە بەشێکی لە ئەستۆی یەکێتیە و ئەوەی ئێستا لەناو یەکێتیدا روودەدات تەنها لە ناو حزبەکانی دەسەڵاتی دیکتاتۆری هەبووە لە مێژوودا".

باسی لەوەشکرد، لە هەڵبژاردنی ئەنجومەنی عێراق لە ساڵی ٢٠٢١ یەکێتی و پارتی و گۆڕان ٥٠٠ هەزار و ١٩٠ دەنگ لە دەنگەکانیان دابەزیوە و ٧٧٪ی خەڵک متمانەی بەم دەسەڵاتە نەماوە و پێچەوانەی بیر و بۆچونەکانی یەکێتی و پارتی و گۆڕان بیردەکەنەوە.

مەلا بەختیار راشیگەیاند، "هەموو تاکێکی کورد دەزانێت هەڵسوکەوتی بەرپرسانی ئێمە چۆنە و کێ گەندەڵە لە دزینی پارەی گومرک و نەوت و داهاتەکان و تائێستا یەکێتی نەیتوانیوە یەک گەندەڵ دادگایی بکات و تەشەنەسەندنی گەندەڵی و دابەزینی دەنگەکانی و نەبوونی دادپەروەری لە ناو یەکێتیدا رەنگی داوەتەوە و رەوت و گروپی جیاواز لە ناو یەکێتی دروستبوون".

لەبارەی هەڵبژاردنەکانیشەوە ئاماژەی بەوەکرد، ئەگەر هەڵبژاردنی ئەمجارەی ئەنجومەنی پارێزگاکان هەڵبژاردنێکی پاک و بێگەرد بێت دۆخی حزبەکانی دەسەڵات خراپ دەبێت.