وەزیری ناوخۆی ئەڵمانیا ڕایگەیاند، کار لەسەر دروستکردنی خاڵی پشکنینی نوێی جێگیر دەکەن بۆ بەرەنگاربوونەوەی کۆچی نایاسایی کۆچبەران لە سنووری پۆڵەندا و کۆماری چیک.
نانسی وەیزەر وەزیری ناوخۆی ئەڵمانیا بە رۆژنامەی "وێلت ئیم سۆنتانگ" ی ڕاگەیاند، حکومەتی ئەڵمانیا کار لەسەر دامەزراندنی خاڵی سنووری پشکنین دەکات بەمەبەستی کۆنتڕۆڵکردنی ئەو کۆچبەرە نایاساییانەی بە سنووری پۆڵەندا و کۆماری چیکدا تێدەپەرن و دێنە سنوورەکانی ئەڵمانیا.
ئاماژەی بەوەشکرد، ئەو خاڵە پشکنینانە دەبنە ئامڕازێک بۆ
ڕێگریکردن لە قاچاخچێتی کە بەهۆیەوە ڕێژەی کۆچی نایاسایی بۆ وڵاتەکە بە شێوەیەکی بەرچاو دادەبەزێت.
باسی لەوەشکرد، پەنابەری یاسایی و کۆچبەری نایاسایی جیاوازن
و ئەگەر هاوڵاتییەک داوای مافی پەنابەری لە سنوورەکان بکات ئەوا پشکنین بۆ داواکارییەکەی
لە ئەڵمانیا ئەنجامدەدرێت و پاشان بڕیار لەسەر پێدانی مافی پەنابەری بەو
هاوڵاتییە دەدرێت و ئەمەش پابەندبوونێکی یاسایی ڕوونە.
ئەمە لەکاتێکدایە، لە هەفتەی یەکەمی ئەم مانگەدا زیاتر
لە هەشت هەزار کۆچبەری نایاسایی روویان لە ئیتاڵیا کرد و بەهۆیەوە باری نائاسایی لەو
وڵاتەدا راگەیاندرا و ئیمانوێل ماکرۆن سەرۆکی فەڕەنسا و جۆرجیا مێلۆنی سەرۆک
وەزیرانی ئیتاڵیا بۆ گرتنەبەری رێوشوێنەکانی رێگریکردن لە لێشاوی کۆچبەران لە دەریای
ناوەڕاست کۆبوونەوەیان ئەنجامدا.