جێگری راوێژکاری ئاسایشی نەتەوەیی ئەمریکا رایگەیاند، رێککەوتنی بنیادنانی هێڵی ئاسنین لە نێوان وڵاتانی یەکێتی ئەوروپا و هیندستان و سعودییە و ئیمارات واژۆکراوە و ئەو پڕۆژەیە سوودی دەبێت بۆ وڵاتە کەم داهاتەکان و دەرخستنی رۆڵی بازرگانی رۆژهەڵاتی ناوەڕاست.
جۆن ڤینەر جێگری ڕاوێژکاری ئاسایشی نەتەوەیی ئەمریکا لە دوای کۆبونەوەی لوتکەی جی ٢٠ رایگەیاند، رێکەوتنامەی هێڵی ئاسنین و گواستنەوەی دەریایی کە رۆژهەڵاتی ناوەراست و باشوری ئاسیا بەیەکەوە دەبەستێتەوە لە نێوان وڵاتانی یەکێتی ئەوروپا و هیندستان و سعودیە لەگەڵ ئیمارات و نەتەوە یەکگرتووەکان واژۆکراوە.
ئاماژەی بەوەشکرد، ڕێککەوتنەکە سوودی بۆ وڵاتانی کەم داهات و مامناوەندی
ناوچەکە دەبێت، هەروەها ڕێگە بە ڕۆژهەڵاتی ناوەڕاست دەدات ڕۆڵێکی یەکلاکەرەوە لە
بازرگانی جیهانیدا بگێڕێت.
ئەوەشی خستەڕوو، ئەم رێککەوتنە یارمەتیدەر دەبێت لە هەناردەکردنی وزە و
بازرگانی لە کەنداوەوە بۆ ئەوروپا، ئەوەش لە ڕێگەی کەمکردنەوەی کات و تێچووی کەشتیوانی
و بەکارهێنانی سووتەمەنی.
رۆژی شەممە، لە نیودلهی پایتەختی هیندستان ١٨ـهەمین کۆبوونەوەی لوتکەی وڵاتانی
جی ٢٠ بەڕێوەدەچێت و تێیدا لەبارەی جەنگی ئۆکرانیا و ئاسایشی خۆراکەوە گفتووگۆدەکرێت.
گروپی جی ٢٠ گروپێکە کە حکومەت و بانکە ناوەندییەکانی ٢٠ وڵات و یەکێتی ئەوروپا
کۆدەکاتەوە و لە ساڵی ١٩٩٩ پێکهێنراوە و دیاترین ئەندامەکانی ئەمریکا و چین و روسیا
و تورکیا و سعودیەن.