بارانبارینی بەخوڕ و لافاو وڵاتانی یۆنان و تورکیا و بولگاریای گرتەوە و بەهۆیەوە چەندان کەس گیانیان لەدەستدا و زیانی زۆریش بە دەیان دامەزراوە و ڕێگاوبان کەوتوە.
رۆژی سێشەممە، دامەزراوەی ئاگر کوژێنەوەی نیشتیمانی یۆنان رایگەیاند؛ لە نزیک شاری ڤۆلۆس بەهۆی داڕمانی دیوارێکەوە لە ئەنجامی لافاو و زریان کەسێک گیانی لەدەستدا و پێنج کەسی دیکەش بێسەروشوێن بون.
دەسەڵاتداران لە چەند ناوچەیەکی یۆنان لەڕێگەی تۆڕەکانی پەیوەندیکردن هاوڵاتیانیان ئاگادار کردەوە جموجۆڵەکانیان لە دەرەوەی ماڵەکانیان سنووردار بکەن.
هاوکات سەرۆکوەزیرانی بولگاریا رایگەیاند، دوای ئەوەی زریان و لافاو لە کەناراوەکانی
باشووری وڵاتەکەی لە دەریای ڕەش دروستبووە، بەهۆیەوە دوو کەس گیانیان لەدەستداوە و
سێ کەسیش بێسەروشوێنن و لافاوەکەش زیانێکی زۆری بە ڕێگاوبان و پردەکان گەیاندووە.
لە لایەکی دیکەوە عەلی یەرلی کایا وەزیری ناوخۆی تورکیا رایگەیاند: بە هۆی
بارانبارینی بەخووڕ و دروستبوونی لافاو، دوو کەس کە یەکێکیان بیانییە گیانیان لەدەستداوە
و پێنج کەسی دیکەش برینداربوون و ٥٦٠ ماڵیش لە سەرتاسەری ئەستەنبوڵ زیانیان بەرکەوتووە.