وەزارەتی نەوتی عێراق رایگەیاند، لە ماوەی مانگی ئابدا بڕی ١٠٦ ملیۆن بەرمیل نەوت هەناردەکراوە و داهاتەکەی نزیکەی نۆ ملیار دۆلار بووە.
رۆژی هەینی وەزارەتی نەوتی عێراق راگەیەندراوێکی بڵاوکردەوە و تێیدا هاتووە، لە ماوەی مانگی ئابدا ١٠٦ ملیۆن و ١٢٢ هەزار بەرمیل نەوت لە عێراقەوە هەناردەکراوە و داهاتەکەشی هەشت ملیار و ٨٤٦ ملیۆن دۆلار بووە.
ئاماژە بەوەشکراوە، لەو بڕە نەوتەی هەناردەکراوە زیاتر لە ١٠٥ ملیۆن
بەرمیل لە کێلگە نەوتییەکانی باشور و ناوەڕاستی عێراق هەناردەکراوە و بڕی ٤٢١ هەزار بەرمیلیش لە کێڵگە نەوتییەکانی
باشوری پارێزگای نەینەواوە هەناردەکراوە.
ئەوەشخراوەتەڕوو، لەمانگی ئابدا عێراق رۆژانە بە تێکڕای سێ ملیۆن و ٤٢٣ هەزار
بەرمیلی هەناردەکردووە، نرخی هەر بەرمیلێکیش ٨٣ دۆلار و ٥١ سەنت بووە.
ئەمە لەکاتێکدایە، لە مانگی تەمووزی رابردوودا داهاتی نەوتی عێراق زیاتر
لە هەشت ملیار دۆلار بووە و بەراورد بە مانگی تەمموز داهاتی نەوت ٥٥٠ ملیۆن دۆلار
زیادیکردووە.