وەزیری دەرەوەی هندستان رایگەیاند، کە لەگەڵ چین رێکەوتوون بۆ کەمکردنەوەی گرژی و ئاڵۆزییەکانی سەر سنوری هەردوو وڵات لە دوای کۆبونەوەیەکی سەرۆکى چین و سەرۆک وەزیرانى هندستان لە پەراوێزى کۆبونەوەى بریکس.
ڤینای کواترا وەزیری دەرەوەی هندستان رایگەیاند، هەردوو وڵاتی چین و هندستان ڕێکەوتن لەسەر لابردنى هێزە سەربازییە گەورەکانیان لەسەر سنورى یەکتر و خاوکردنەوەى گرژى نێوانیان.
وەزارەتى دەرەوەى چینیش راگەیەندراوێکى بڵاوکردەوە و
ئاماژەی بەوەکردووە، ناکۆکییەکانى سنورى هەردوو وڵات خاوکراونەتەوە و پێویست ناکات
چیتر هێزى سەربازى زۆر لەسەر سنورى هەردوو وڵات کۆبکرێنەوە.
چین و هندستان ساڵانێکە لەسەر سنور کێشە هەیە لە نێوانیاندا،
بەڵام هەردوو وڵات خاوەنى پەیوەندییەکى ستراتیژى گەورەن لە جیهاندا و ماوەى زیاتر
لە ١٠ ساڵیشە دوو ئەندامى کاراى بریکسن کە رێکخراوێکە و دەوترێت بۆ بەربەستکردنى هەژمونى
ئەمریکا و ئەوروپایە.
لە ٢٢ـی ئەم مانگە ١٥ـەمین لوتکەی بریکس لە ئەفریقای
باشوور دەستی پێکرد و سەرۆکانی وڵاتانی
روسیا، چین، هندستان، بەرازیل و ئەفریقای باشوور بەشدارییان تێداکرد و ماوەی سێ رۆژی
خایاند.