سەرۆکى نەیجیر، کە ئێستا لەلایەن بەشێک لە سەربازانى کۆشکى کۆمارى کە بە کودەتاچییەکان ناسراون، لەناو کۆشکى سەرۆکایەتى لە نیامى پایتەخت تەوق دراوە، ناوبراو تویتێکى کردووە و نوسیوویەتى، "دەستکەوتە دیموکراتیەکان دەپارێزرێن".
سەرلەبەیانى ئەمڕۆ پێنجشەممە، محەمەد بازوم سەرۆکى نەیجیر، لە تۆڕى کۆمەڵایەتى ئێکس، کە پێشتر تویتەر بوو، تویتێکى کردووە و نوسیوویەتى، "دەستکەوتەکانى دیموکراتى لە وڵاتەکەى دەپارێزرێن"، هاوکات ئاماژەى بەوەکردوە "ئەو دەستکەوتانە لەدواى هەوڵ و تێکۆشانێکى قورس بەدەستهاتوون، هەموو رۆڵەکانى وڵاتەکەى ئەوانەى خۆشەویستیان بۆ دیموکراتییەت و ئازادى هەیە درکى پێدەکەن".
بەرەبەیانى رۆژى چوارشەممە، کاتێک سەرۆکى نەیجیر چاوى
هەڵهێنا، بە دەیان ئۆتۆمبیلى سەربازى و زرێپۆش و چەکى قورس و سووک، بەردەم کۆشکى
سەرۆکایەتییان تەوق داوە و داواى خۆڕادەست کردنى دەکەن.
لاى خۆیەوە حەسومى مەسعودۆ وەزیرى دەرەوەى نەیجیر، کە
لەهەمان کاتدا سەرۆک وەزیرانە بە وەکالەت، کودەتاکردن بەسەر وڵاتەکەیدا رەتکردەوە
و تەئکیدى کردەوە، "ئەوان نوێنەرایەتى راستەقینەى دەسەڵاتى یاسایی وڵاتن".
هەوڵى کودەتاکەى نەیجیر، بەزوویى کاردانەوە هەرێمى و
نێودەوڵەتییەکانى بەدواى خۆیدا هێنا و هەریەک لە ئەمەریکا و ئەڵمانیا و فەڕەنسا
ئیدانەى ئەو کودەتایەیان کرد، لەو چوارچێوەیە، حکومەتى فەڕەنسا ئیدانەى دەست گرتن بەسەر کورسى فەرمانڕەوایی کرد لەرێگەى هێزەوە، واشنتۆن-یش دەستبەجێ ئەنتۆنى بلینکن-ى وەزیرى دەرەوەى وڵاتەکەى راسپارد، بۆ زوو دەربازکردنى محەمەد بازوم سەرۆکى
نەیجیر، هەروەها حکومەتى ئەڵمانیاش رایگەیاند، نیگەرانن لە دۆخەکە و لەنزیکەوە
چاودێرى دەکەن، هاوکات داواى دەستبەجێ ئازاد کردنى سەرۆکى نەیجیرى کرد.
بەگوێرەى زانیارییەکانى ئاژانسى رۆیتەرز، وەزیرى ناوخۆى
ئەو وڵاتەش لەماڵەکەى خۆى دەستبەسەرە، هاوکات ئێستا دانوستاندن لەنێوان سەرۆکى
نەیجیر و سەربازانى کودەتاچى لە ئارادایە.