لە دووەم رۆژی سەردانەکەیدا وەزیری دەرەوەی ئەمریکا، لەگەڵ سەرۆکی چین کۆبووەوە، تاوتوێی بەهێزکردنی پەیوەندیەکانیان کرد.
میدیای فەرمی چین بڵاویکردەوە، شی جینپینگ، سەرۆکی چین لە کۆبوونەوەکەدا باسی لەوەکردووە، هیوادارە سەردانەکەی ئەنتۆنی بلینکن وەزیری دەرەوەی ئەمریکا بۆ وڵاتەکەی ببێتەوە هۆی بەهێزکردنی پەیوەندیەکانیان.
سەرۆکی
چین ئاماژەی بەوەشکردووە، پێویستە هەمیشە کارلێکەکانی نێوان وڵاتان لەسەر بنەمای رێزگرتن
و راستگۆیی بێت و هیوادارە، سەردانەکەی بلینکن دەستپێشخەریەکی ئەرێنی بێت بۆ
دەستەبەرکردنی پەیوەندیەکی سەقامگیر لە نێوان چین و ئەمریکا.
دوێنێش،وەزارەتی دەرەوەی ئەمریکا راگەیەنراوێکی
بڵاوکردەوە و تیایدا هاتووە، گفتوگۆکانی ئەنتۆنی بلینکن وەزیری دەرەوەی ئەو وڵاتە
لەگەڵ چین گانگ وەزیری دەرەوەی چین ئەرێنی و بنیادنەر بووە.
لەلایەکی دیکەوە، بەپێی راپۆرتێکی رۆژنامەی
نیویۆرک تایمزی ئەمریکی ئەو دۆسیانەی لە کۆبوونەوەکە گفتوگۆی لەسەرکراوە لەلای هەریەکە
لە ئەمریکا و چین گرنگن، بەڵام کۆنتڕۆڵی هەنگاونان بەرەو پێشەوە بە دەست چینە بەوپێیەی
پارێزگاری لە هەڵوێستی خۆی لە روبەڕووبوونەوەکان کردووە.
ئەم
سەردانە لە کاتێکدایە کە پەیوەندییەکانی چین و ئەمریکا ئاڵۆزی و ناکۆکیەکی گەورەی
بەخۆیەوە بینیوە، ئەوەش دوای ئەوەی بڕیار بوو بلینکن لە مانگی شوباتی ئەمساڵ
سەردانەکەی بۆ چین ئەنجام بدرێت، بەڵام بەهۆى فڕینی باڵۆنێکی چینی بەسەر ئاسمانی
ئەمریکادا پەیوەندییەکانیانى زیاتر گرژکرد و سەردانەکەشى دواخست.